Qərb topu Rusiyanın meydanına atdı – “Barıt qoxusu çəkiləcək?”
13:55 / 27.01.2022
914
"Qərb-Rusiya
qarşıdurması Ukraynanın başı üzərində yaratdığı qara buludları daha da
qatılaşdırır, hərçənd, NATO Kremlin təhlükəsizlik konsepsiyasına dair tələblərinə
cavab verdiyini açıqlayıb. Ancaq bu cavab münaqişənin müharibə həddinə
çatmasını ən azından qısa müddətə təxirə salmaqdan başqa bir işə yaramayacaq”.
Sfera.az xəbər
verir ki, bunu siyasi məsələlər üzrə ekspert Aqşin Kərimov deyib.
Onun sözlərinə
görə, Qərb hərbi-siyasi kuluarlarından verilən bəyanatlar, Kremlin əsas tələbininin
NATO-nun filtrindən keçmədiyini göstərir:
"ABŞ dövlət
katibi Entoni Blinken və NATO Baş katibi Yens Stoltenberq çəkici eyni nöqtəyə
döyərək Moskva üzərində inadkarlıq nümayiş etdirirlər.
Bununla belə, düşünmək üçün məntiqi əsaslar var ki, diplomatik təmaslar nəticəsində
Rusiyanın öz təhlükəsizliyinə dair NATO-dan zəmanət istəyən hədəqarışıq layihəsinin
hansısa bəndləri razılaşdırılıb.
İndi qalır
yeni qurulan "şahmat taxtasında” hansı dövlətin hansı damada yer alması məsələsi. Düşünmək çətin
deyil ki, Qərb-Rusiya hibrid müharibəsinin real döyüş səviyyəsinə çatması başqa
ölkələrdə gerçəkləşə bilər”.
Ekspert qeyd
edib ki, siyasi-diplomatik intensivlik
Ukraynanı müharibə meydanına çevirməyəcək:
"Bu arada,
qarşılıqlı hədələr tonunun üstünlük təşkil etdiyi bəyanatlar bir məsələnin də
effektiv nəticələr hasil etməyəcəyini ortaya qoyur. Qərbin Moskvanı diz çökdürmək üçün
sanksiyalar arqumenti hərbi qarşıdurma ehtimalını nəinki azaldır, əksinə daha
da güclü hala gətirir. Birincisi,
ona görə ki, Rusiyanın bu sanksiyalara qarşı kontur tədbirləri mövcuddur. İkincisi,
sanksiyalar beynəlxalq maliyyə-iqtisadi sistemini müəyyən gəlirlərdən məhrum
edir ki, bu, heç Qərb şirkətlərinin də marağında deyil. Üçüncüsü,
Rusiyaya bu zamana qədər tətbiq edilən sanksiyaların işləmə mexanizmində
yarımçıqlıq üstünük təşkil edib.
İndi sual
budur: NATO-nun topu Rusiyanın meydançasına atması Kremlin gələcək
addımlarındakı barıt qoxusunu aradan qaldıracaqmı? Çətin ki,
regionda "barıt çəlləyi” yoxa çıxsın, ona görə ki, NATO-nun təqdim etdiyi sənədin
mahiyyətinə dair açıqlamalar əhəmiyyətli razılaşmanın əldə olunmadığını göstərir”.
Turan Rzayev