Bu barədə Sfera.az-a danışan sabiq xarici işlər naziri Tofiq Zülfüqarov bu açıqlamanın həqiqiliyinə inanmadığını dedi:

"Ermənilərin təxribatına oxşayır. Hiss olunur ki, İrəvan bir müddətdir Rusiyadan narazılıq edir. Seçkilərdən sonra Paşinyanın qərbyönümlü addımları daha da güclənib. Bəlkə də onları təmin etmək və antirusiya əhval-ruhiyyəsi yaratmaq üçün təxribat xarakterli belə dezinformasiyaları gündəmə gətiriblər. Məqsəd Qərbin maraqlarına cavab verməklə, Ermənistanda antirusiya əhval-ruhiyyəsini daha da gücləndirməkdir. Amma təəccüblüsü odur ki, məlumat ilk olaraq Türkiyə mənbəyindən gəlib”. 

Digər tərəfdən, T. Zülfüqarovun fikrincə, Putin belə bir öhdəlik götürübsə də, o bu barədə heç zaman açıqlama verməyəcək: 

"Bu siyasi məntiqə uyğun deyil. Mətbuatda, sosial şəbəkələrdə baş verən hadisələrin arxasında hansı məntiqin, hansı razılaşmanın olması barədə müxtəlif fikirlər səslənir. Məntiq isə ortadadır, onu görmək çox asandır. Əsas məntiq odur ki,  Azərbaycan torpaqlarının işğalına tam olaraq son qoyulmalıdır. Bu baxımdan ermənilər yaşayan məntəqələrdə hansısa təhlükəsizlik addımları da atılır. Bunun da məqsədi Qarabağda yaşayan ermənilərə Azərbaycanın tərkibində yaşamağa hazırdırlarsa, orada qalmalarına imkan verməkdir. Yoxsa, istəmirlərsə, yavaş-yavaş görürük ki, ermənilər Qarabağdan gedirlər. Oradakı ermənilər bu məntiqi başa düşür. Gec və ya tez, Azərbaycanın suverenliyinin bərpası tam şəkildə baş verəcək. Buna heç bir şübhəm yoxdur”.