Bu barədə Sfera.az-a danışan "Atlas” Araşdırmalar Mərkəzinin rəhbəri Elxan Şahinoğlu bildirdi ki, Putinin həmin fikirləri ikibaşlı xarakter daşıya bilər:

"İkibaşlı açıqlamadır. Bir tərəfdən, o Azərbaycanın ərazi bütövlüyünü vurğulayıb. Bir tərəfdən deyir ki, Ermənistan özü Dağlıq Qarabağı tanımayıb. Beynəlxalq aləm də Dağlıq Qarabağı Azərbaycan ərazisi kimi tanıyır. Amma digər tərəfdən, müsahibələrində təhlükəli məqamlar da yer alıb. Qarabağı Abxaziya, Cənubi Osetiya və Krımla müqayisə edərək sanki mesaj verir ki, hansısa bir problem çıxsa, Dağlıq Qarabağı tanıya da bilərlər. Digər tərəfdən, Rusiya sülhməramlıları separatçılarla çox əlaqəli şəkildə işləyir. Rusiyanın Fövqəladə Hallar naziri də Dağlıq Qarabağa gəlib".

Bu səbəblərdən həmsöhbətimiz Putinin hər zaman açıqlamaları ilə real fəaliyyəti arasında fərqlərin olduğunu diqqətə çatdırdı:

"Tək Rusiya rəhbəri deyil, bütün dünya Azərbaycanın ərazi bütövlüyünü tanıyır. Tanımasaydı, qeyri-adi məsələ olardı. Ona görə də Putinin Azərbaycanın ərazi bütövlüyünü tanımasından təbii heç nə yoxdur. Sadəcə, bundan sonra Rusiyanın addımlarına diqqət yetirməliyik".