Paşinyanın \"ölü doğulan\" arzusu - \"Bu Ermənistanda ciddi fəlakətə gətirib çıxaracaq\"
15:18 / 13.01.2021
2392
Moskva görüşündə Ermənistan baş naziri Nikol Paşinyan Minsk qrupu həmsədrlərinin vasitəçiliyilə danışıqlarda iştirak etmək istəyini ortaya atıb.
Elçin
Sfera.az
Bəs bu istəyin arxasında nələr dayanır?
Bu barədə Sfera.az-a danışan politoloq Məhəmməd Əsədullazadə bildirib ki, Paşinyanın bu açıqlaması daxili auditoriyaya hesablanıb.
"Bu onun avantürasından irəli gəlir, populizmə əsaslanır. Paşinyan bununla özünü sığortalamaq istəyir. Göründüyü kimi, Ermənistan yenə də status məsələsini qaldırmağa çalışır. İrəvan həmçinin, yenidən ATƏT-in Minsk qrupu həmsədrləri səviyyəsində danışıqların aparılmasında maraqlıdır.
Bununla Paşinyan göstərmək istəyir ki, guya Ermənistan Dağlıq Qarabağ məsələsində prinsipialdır. Göstərmək istəyir ki, Ermənistan Minsk qrupu həmsədrləri çərçivəsində danışıqlarda maraqlıdır və hələ də Qarabağ problemi qalır. Bu sayaq açıqlama ilə Paşinyan özünə qarşı kəskin mövqe sərgiləyən müxalifəti susdurmağı da düşünür. Qəbul edilən üçtərəfli bəyanatda da Minsk qrupunun hər hansı bir şəkildə yenidən dirildilməsi istiqamətində heç bir bənd yoxdur. Son Moskva görüşündə də Bakı ilə Rusiya buna qarşı çıxdı”.
M. Əsədullazadə qeyd etdi ki, Azərbaycan üçün artıq Minsk qrupu məsələsi bitib:
"Münaqişə demək olar tarixdə qaldı. Qarabağın statusu məsələsi isə Azərbaycanın daxili işidir. Ona görə də Ermənistanın bu şərtləri heç zaman qəbul edilməyəcək. ATƏT-in Minsk qrupunun yenidən format almasını Bakı qəti şəkildə qəbul etməyəcək. Onun yenidən dirilməsi proses ətrafında növbəti problemlərə səbəb ola bilər. Paşinyanın nə deməsindən asılı olmayaraq Minsk qrupu artıq arxivə göndərilməlidir”.
Politoloqun fikrincə, Ermənistan baş nazirinin buna getməsi onun üçün ciddi problemlər yaradacaq:
"Bütün hallarda proses getdikcə, Ermənistanda Qarabağ məsələsinin unudulmasına gətirib çıxaracaq. Paşinyan da yaxşı bilir ki, növbəti münaqişə Ermənistanda daha ciddi fəlakətə gətirib çıxaracaq”.
Sfera.az