Azərbaycanın pambıq ixracından əldə etdiyi gəlirdə artım müşahidə edilir. "Ağ qızıl”ın 2020-ci ilin üçüncü rübündən bahalaşması və ixraca daha çox məhsulun çıxarılması satışdan əldə edilən gəlirin artmasına şərait yaradıb.
 
Sfera.az gömrük məlumatlarına istinadən bildirir ki, Azərbaycan 2019-cu ilin yanvar-fevralında 17 883 ton pambıq mahlıcı 25,961 milyon dollara, 2020-ci ilin yanvar-fevralında 21 743 ton pambıq mahlıcı 30,356 milyon dollara satdığı halda 2021-ci ilin eyni dövründə 26 443 ton pambıq mahlıcı 37,356 milyon dollara satıb. Orta hesabla pambığın hər tonu 2019-cu ilin ilk 2 ayında 1 451 dollara, 2020-ci ilin 2 ayında 1 396 dollara, 2021-ci ilin eyni dövründə 1 412 dollara satılıb.
 
Beynəlxalq bazarlardakı qiymət dinamikasını təhlil etdikdə görürük ki, pambığın dəyərində artım 2020-ci ilin aprelindən 2021-ci ilin martına kimi daha güclü olub. Bu dövrdə pambığın qiymətindəki artm 46 faizi ötüb. Bu o deməkdir ki, eyni miqdarda pambığın satışından əldə edilən gəlir təxminən 50 faiz artıb.
2020-ci ilin aprelində bir tonu 1410 dollar olan pambığən dəyəri 2021-ci ilin fevralında 2060 dollar olub. 
 
2018-2020-ci illər ərzində pambığın dünya bazarı qiymətində azalma müşahidə olunurdusa, 2020-ci ilin may ayından etibarən pambığın dünya bazarı qiymətində artım müşahidə edilir. Yalnız 2021-ci ilin fevralında pambığın 1 tonunun qiyməti əvvəlki ay ilə müqayisədə 6,2 faiz artıb.
 
Azərbaycan qiymət artımlarının gətirdiyi qazancı növbəti aylarda daha çox müşahidə edəcək. Çünki dünya bazarında satılan pambıq 2 ay əvvəl bağlanan müqavilələrə əsasən aparılır. Buna görə də ölkəmiz mart və apreldə pambığı daha baha satmaq imkanı qazanacaq. Bunu 2021-ci ilin yanvar və fevral aylarındakı ixrac qiymətlərindən də görə bilərik.Yanvarda satdığımız hər ton pambığın qiyməti 1 377 dollar olmuşdusa, fevralda 1440 dolları ötüb. Qiymət dəyişikliklərini nəzərə alsaq deyə bilərik ki, Azərbaycanın satacağı pambıq mahlıcın orta qiyməti 1600 dollara, apreldə 1700 dollara yüksələcək.
 
Vasif
Sfera.az