Aparılan araşdırmalara görə, binaların isidilməsində enerji itkisinə daha çox divarlarda yol verilir. Enerji itkisinin 40 faizi divarlarda, 18 faizi tavanda, 18 faizi pəncərədə, 10 faizi zirzəmidə, 14 faizi isə qazanxanadan gələn xətlərdə olur. Avropalı ekspertlər düşünür ki, enerji xərclərini azaltmaq üçün onun istehlakını azaltmağa nail olmaq lazımdır. Bu məqsədlə binaların soyuqdan düzgün qorunması və isitmə sisteminin düzgün təşkili tövsiyə edilir.

Sfera.az bildirir ki, Azərbaycanda da binaların isidilməsində enerjidən səmərəli istifadə edilməməsi aktual problemlərdəndir.Aparılan sınaq nümunələri göstərir ki, ölkəmizdə çoxmənzilli binalarda enerji itkisini 2-2,5 dəfə azaltmaq olar. Enerji itkisinin böyük olmasının səbəbi binaların düzgün layihələndirilib tikilməməsidir.

Tədqiqatlar göstərir ki, sovet dövründə beton panellərdən istifadə etməklə tikilən binalarda ən azı 2 dəfə enerjiyə qənaət etmək mümkündür. Bunun üçün ilk növbədə çoxmərtəbəli binalarda mənzillər fərdi qaydada deyil, mərkəzləşdirilmiş qaydada, qazanxana sistemi ilə istiliklə təchiz edilərək qızdırılmalıdır. Mərkəzləşdirilmiş istilik sistemi mövcud sərfiyyatdan 2,5 dəfə az enerji istifadə etməyə imkan verir.

Çoxmərtəbəli binalarda fərdi qaydada mənzillərdə "kombi” sistemlərinin qurulması sağlamlıq baxımından da düzgün deyil. Çünki aşağı mərtəbədə "kombi”si olan mənzil yuxarı mərtəbədəki mənzil üçün ekoloji disbalans yaradır, qonşusunu zəhərləyir. Bu cür sistemlər şəhərkənarı fərdi mənzillərdə quraşdırılması üçün nəzərdə tutulub.

Qeyd edək ki, ölkəmizdə də kommunal, xüsusən də enerji daşıyıcılarına çəkilən xərclər artır. Azərbaycanda ailələrin xərclərinin 8 faizi su, işıq, qaz və digər yanacaq növlərinə çəkilən xərclərdən ibarətdir. On il əvvəl kommunal xərclərin cəmi xərclərdə payı 5 faizdən az idi. Artan xərcləri tənzimləmək məqsədilə enerjidən səmərəli istifadə edilməsi olduqca böyük əhəmiyyət kəsb edir.

Vasif

Sfera.az