Bu sözləri Sfera.az-a Ukrayna Kulinarlar Birliyinin üzvü, Türkiyə Şef Aşcılar Dərnəyinin Azərbaycan təmsilçisi, qida texnoloqu Ağa Salamov deyib. O, dəfələrlə bu mövzuda xəbərdarlıqların, çıxışların edilməsinə rəğmən, nəticənin eyni olduğunu qeyd edib:

"İnsanların istehlak etdiyi elə qidalar var ki, alıb evə gətirdikləri zaman yumadan istehlak edirlər. Məsələn, çörək, çərəzlər, müxtəlif un məmulatları və s. Bu cür məhsulların yuyulub dezinfeksiya olunmamasını nəzərə alaraq, daşınmasına, rəflənməsinə və paketlənməsinə ciddi nəzarət olmalıdır. Amma nə görürük?  Qida zəncirində ciddi problemlərin hələ də baş alıb getdiyinin şahidi oluruq”.

Müsahibimiz bildirib ki, açıq şəkildə çörəklər çirkli maşınlarda daşınır:

"Eyni zamanda çörəyin üstü açıq şəkildə rəflənməsi müşahidə edilir. Halbuki üstü açıq məhsulların üzərində örtük olmalıdır. Çörəyin marketlərdə, marketə məxsus daşınma arabasında daşınması halları mövcuddur. Amma bu arabada öncə nə daşınıb və ya arabaya koronavirus xəstəsi toxunubmu? Bilmirik! Çörəyin daşınmasını çörək sexləri özləri təmin etməlidilər və sanitar gigiyena qaydalarına xüsusi diqqət yetirməlidirlər. İsti və yumşaq çörəyi seçən müştəri yalın əli ilə üstü açıq olan çörəklərə toxunur ki, bu da virusun yayılmasına şərait yaradır. Heç kim qaranti verə bilməz ki, çörəklərə yalın əl ilə toxunan insanların içində COVİD-19 xəstəliyinə yoluxan yoxdur”.