“OPEC+” gözləntini doğrultmadı - Neft daha da bahalaşdı
11:59 / 05.10.2021
507
Dünən "OPEC+” (Neft İxrac edən Ölkələr Təşkilatına (OPEC) üzv və qeyri-üzv ölkələr) çərçivəsində ölkələrin nazirlərinin qəbul etdiyi qərar neft qiymətlərinin xeyli artmasına səbəb olub. Nazirlərin 21-ci iclasında noyabrda gündəlik neft hasilatının 400 min barrel artırılmasına dair qəbul edilib və bu qərara Azərbaycan da öz dəstəyini verib.
Sfera.az bildirir ki, görüşdən öncə qeyri-rəsmi danışıqlar aparılıb. Danışıqlarda dünyada neftə tələbin güclənməsini və qaz qiymətlərinin sürətlə artmasını nəzərə alaraq gündəlik hasilatın 400 min yox, 800 min barel artırılması təklif edilib. Lakin ölkələrin əksəriyyəti bu təklifi qəbul etməyib və əvvəl əldə edilən razılaşmaya uyğun olaraq gündəlik hasilatın 400 min barel artırılması fikrini dəstəkləyiblər.
Nazirlərin görüşündən öncə hasilatın daha çox artırılmasına dair çağırışlar var idi. Birja iştirakçıları da neftə tələbin təklifi keçdiyini nəzərə alaraq hasilatın nəzərdə tutulandan çox artırılacağını gözləyirdilər. Amma yekun qərar onu göstərdi ki, "OPEC+” əvvəllər əldə edilən razılaşmanı hələ dəyişmək istəmir.
Ekspertlər bildirir ki, neft hasilatının 400 min barel artırılması ölkələrdə saxlanclarda olan ehtiyatların bir qədər də azalmasına səbəb olacaq. Çünki gündəlik hasilatın artırılmasından sonra da neft istehlakı, neft hasilatından çox olacaq.
"OPEC+” ölkələrinin bu mövqeyi dünən "Brent” neftinin qiymətini 81,9 dollara qədər yüksəldib. Bu qiymət səviyyəsi 2018-ci ilin oktyabrından sonra qeydə alınan ən yüksək səviyyədir. Əgər qiymətlər daha 1,5 dollar artarsa, o halda, 2014-cü ilin ikinci yarısından sonra ən yüksək qiymətlər qeydə alınacaq.
Şərhlərdən aydın olur ki, OPEC plusun qərarı nəzərdə tutulduğu müddətə qədər, yəni 2022-ci ilin sentyabrına qədər qüvvədə qalarsa, birjalarda neft qiymətlərini bir qədər də yüksələcək. Hətta gözləntilərə görə qiymətlərin 100 dollar həddinə çatması realdır.
Qeyd edək ki, qərara əsasən Azərbaycan da gündəlik neft hasilatını artıracaq. Azərbaycan gündəlik xam neft hasilatını noyabrda daha 7 min barrel artıraraq 647 min barelə çatdıracaq. Bu qərar kondensat istehsalına aid olmayacaq. Kondensat istehsalı da nəzərə alınarsa, noyabrda Azərbaycanın gündəlik neft hasilatı 763 min tonu ötəcək.
Vasif
Sfera.az