\"Onda hər səhvimizdə biz də şillələnək\" - Aparıcıdan şagirdlərin döyülməyini dəstəkləyənlərə REAKSİYA
16:47 / 13.01.2022
1367
"Məktəb direktorunun uşağı vurmağına bəraət qazadıranların fəlakətli dərəcədə çox olmasını nəzərə alaraq, təklif edirəm: Yol hərəkəti qaydalarını pozarkən yol polisi bizə cərimə yazmaq əvəzinə, qəşəng bir şillə vursun”.
Sfera.az bildirir ki, bunu tanınmış aparıcı Hüsniyə Məhərrəmova son günlər müzakirə obyektinə çevrilən məsələyə münasibət bildirirkən deyib. O, digər təkliflərini bu cür sıralayıb:
"Növbədə dura bilmirik, mədəniyyətsizik, valideynlərimiz bizi öyrətməyib ki, adam gözləyər, növbəsiz özünü soxmaz. Ona görə təklif edirəm ki, kassir də hər dəfə gəlib bizə bir şillə vursun. Avaralıqla məşğul olanda, polis İnzibati Xətalar Məcəlləsinin 307-ci maddəsindəki xəbərdarlıq və on günədək müddətə inzibati həbsin yerinə, gəlsin bir dənə yağlı şillə vursun getsin. İşi vaxtında təhvil verməyəndə, "deadlin"ı keçəndə müdir bizə şillə vursun. Restoranda ofisianta az çay pulu qoyanda, o da gəlsin bizə şillə vursun. Maaşımızı kəsəndə, müdir bizi işdən çıxaranda, daha keçib, gedək biz də bir dənə şillə vuraq...”.
Aparıcı şagirdləri döyməyin tərəfdarı onları kəskin tənqid edib:
""Bizi də müəllim döyüb də, söyüb də, zərimiz tökülməyib ki...", "Ağbirçək şilləsidir də, nə şişirdirsiz", "Guya bizi döyməyiblər, nolsun ki, tərbiyə edir", "Bəzi uşaqlar tərbiyəsizdir, onları elə vurmaq lazımdır ki, ağılları başına gəlsin" və s. bu kimi şərh yazan homonoidlər, - xəstə, yaltaq və qorxaq cəmiyyətin kökləri elə sizsizmiş ki”.
Türkan
Sfera.az