\"NKVD\" türmələrində ifadələri bu işgəncələrlə alıblar - \"Cinsi orqana zərbələr, həşaratlar, mismarlı stullar...\"
15:03 / 13.11.2021
3070
10 iyul
1934-cü ildə SSRİ Mərkəzi İcraiyyə Komitəsinin qərarı ilə yaradılan Xalq Daxili
İşlər Komissarlığı (NKVD) bu ad altında 12 il, 1946-cı ilə qədər fəaliyyət göstərib.
"NKVD” SSRİ-də yeganə qurum olub ki, 12 il ərzində ona rəhbərlik edən dörd komissarın
(nazirin) üçü güllələnib, biri isə müəmmalı şəkildə qatarın altına düşərək
ölüb.
Belə ki,
ilk komissar Henrix Yaqoda 1938-ci ildə, Nikolay Yejov 1940-cı ildə, Lavrenti
Beriya 1953-cü ildə ən ağır cəzaya -güllələnməyə məhkum olunublar. Sergey Kruqlovun
həyatına isə Yaroslavl istiqamətindəki Pravda stansiyası yaxınlığında üstündən
keçən qatar son qoyub.
"NKVD” təkcə
rəhbərlərinin faciəli ölümləri ilə yadda qalmayıb. Milyonlarla insanın ölümünə,
sürgünə göndərilməsinə, günahsız insanlara "vətən xaini” damğası vurulmasına
"NKVD”-nin kabinetlərində fərman verilib. Bu qurumun qanun çərçivəsində müəyyən
olunmuş funksiya və təyinatları ilə yanaşı, qeyri-rəsmi digər bir vəzifəsi də
olub: insanlarda xof yaratmaq, kütlələri qorxu içində saxlamaq.
Ola bilər
ki, bu qurumla bağlı miflər də yaranıb, amma "NKVD”-nin amansız, ağılasığmaz fəaliyyəti
haqqında həqiqəti əks etdirən faktlar da az deyil. İllər ötsə də, elə indi də bəzən
yaşlı nəslin nümayəndələri "NKVD” haqqında az qala ehtiyatla danışırlar.
"NKVD”-ni
bu qədər qorxulu edən nə olub?
Repressiya,
həbslər, sürgünlər, günahsız insanların güllələnmələri öz yerində. Bunlarla
yanaşı, bu qurumun türmələrində insanlara verilən işgəncələr sözün əsl mənasında,
sözlə ifadə edilə bilməyəcək qədər dəhşətli olub.
Həmin
dövrün şahidlərinin, təsadüf nəticəsində "NKVD” zirzəmilərindən sağ çıxanların
söylədikləri bu dəhşətləri bir daha sübuta yetirir.
Söylənilənlərdən
belə qənaətə gəlmək olar ki, işgəncələrin "kəşf”i üçün xüsusi bir qrup işləyib,
bu qrup zaman-zaman yeni işgəncə metodları fikirləşiblər, daha amansız, daha sərt,
daha ağrılı və dözülməz işgəncələr...
İnsanın
dərisi üzərində siqaret söndürmək, yaxud kəlbətinlə dırnaqlarını çıxarmaq "NKVD”
cəlladları üçün ən adi və ən asan cəza sayılıb.
Məhbusları
dəli olmaq vəziyyətinə gətirmək üçün kameralarda xüsusi səsgücləndiricilərdən
istifadə olunub. Belə ki, müstəntiqlər ittiham olunanlardan ifadə alarkən,
sualları onlara bu səsgücləndirici vasitələri qulaqlarına yerləşdirərək veriblər.
Səs o qədər güclü olub ki, sinir sistemində fəsad yaratmaqla yanaşı, həm də məhbusların
qulaqlarından qan açılıb.
O cümlədən,
kameralara həddindən artıq güclü işıq verilib. Bir neçə sutka gecə və gündüz bu
"işıqlı kamera”da oturan məhbusun gözləri hədəqəsindən çıxmaq dərəcəsinə çatıb.
İşgəncələrdən
biri də məhbusları 10-15 gün ac saxlamaq olub ki, bundan sonra onlar istənilən
ifadəni verməyə razı olublar.
Döyülmə
prosedurları gündəlik işgəncələrdən biri olub ki, burada əsas zərbələr cinsi
orqanlara yönəldilib.
Ən ağır
cəzalardan biri susuzluqla bağlı olub. Amma bu cəza növündə məhbuslar əvvəlcə
yaxşı "qidalandırılıb”. Belə ki, onlara duzlu-istiotlu qidalar yedizdirilib.
Bundan sonra isə lazım olan müddətə qədər onlara su verilməyib.
İfadəni
tez və rahat almaq üçün məhbuslar tam soyundurularaq üzərində mismarlar olan
stullara əyləşdirilib. Bu işgəncədən sonra məhbusdan istənilən ifadəni almaq
asanlaşıb.
İşgəncənin
daha bir növü xüsusi kameralarda həyata keçirilib. "Otstoynik” adlanan bu
kameralara o qədər məhbus yerləşdirilib ki, burada nəinki oturmağa, hətta əyilib
ayağını qaşımağa imkan olmayıb. Sıxlıq o dərəcədə olub ki, məhbuslardan kimsə
ölübsə, onun meyiti də ayaqüstə qalıb.
Daha dəhşətli
işgəncələrdən biri xüsusi hazırlanmış şkaflarda tətbiq edilib. Belə ki, həmin
şkafların içərisinə yalnız bir nəfəri güclə yerləşdirmək mümkün olub. Həmin
şkafların içərisinə böyük sayda həşəratlar doldurulub, sonra isə məhbus həmin
şkafın içərisinə pərçim edilib.
İşgəncələr
çöl şəraitində də həyata keçirilib. Məhbusları boğazlarına qədər torpağa basdırıblar.
"Karser”
işgəncələri isə əsl cəhənnəmi xatırladıb. Burada məhbusları sutkalarla yuxuya həsrət
qoyublar. Soyuq havalarda "karser”ə buz kimi su buraxıblar. Məhbuslar beton
kamerada dizə qədər suyun içində saxlanılıb.
NKVD təcridxanalarında
qadınlar üçün də cəzalar tətbiq olunub. Qadınlar üçün ən "populyar” cəza növü
cinsi zorakılığa məruz qalmaq olub. Hətta bəzən bir qadın tam soyundurularaq,
50-60 nəfərlik kişi kamerasına buraxılıb.
Nəzərdə
tutulan ən dəhşətli işgəncə isə körpəsi olan qadınlara tətbiq edilib. Belə ki,
onların gözünün qabağında körpələrinin dırnağı çıxarılıb, qızdırılmış dəmir
parçalar uşaqların bədəninə yapışdırılıb.
Əgər bu
və ya digər cəza növlərinin tətbiqi ittiham olunanlardan lazımi ifadəni almaq məqsədi
daşıyıbsa, ikinci bir tərəfdən bu cəzaları tətbiq etməklə cəllad xislətli "NKVD”
əməkdaşları zövq alıblar, cəza prosedurları onlar üçün əyləncəyə çevrilib. Amma
bu işgəncələri verərkən çoxları düşünməyib ki, özlərinin də yolu bu
kameralardan düşə bilər.
Faktlara
istinad etsək, şahidi olarıq ki, saysız-hesabsız "NKVD” əməkdaşları sonda özləri
də bu türmələrin "qonağı” olublar. Yüksək çinlilər isə nə vaxtsa tətbiq
etdiklri işgəncələrə məruz qalmamaq üçün intihar yolunu seçib.
Qeyd edək
ki, tarixə amansız "yejovşina” dövrünü yazan "NKVD”-nin ən amansız rəhbərlərindən
biri olmuş Nikolay Yejov bu qurumun zirsəmisində vaxtilə tabeliyində olan əməkdaşlar
tərəfindən ən ağır işgəncələrə məruz qalıb...
Sfera.az