Neft bahalaşır: Azərbaycana hansı müsbət və mənfi təsirləri olacaq?
15:58 / 13.01.2022
1230
Azərbaycan neftinin qiyməti ötən gün 88,45 dollara yüksəlib. Bununla da son bir ayda ölkəmizdən ixrac edilən neftin dəyərində artım 16 faizi ötüb.
Sfera.az bildirir ki, Azərbaycan neftinin son bir ayda sürətlə bahalaşmasının səbəbi beynəlxalq birjalarda neft qiymətlərinin yüksəlməsidir. Neft qiymətlərində növbəti yüksəliş 2021-ci ilin noyabrın sonundan müşahidə edilir.
Noyabrın sonunda "Brent” neftinin qiyməti 69 dollar idi. Sürətlə bahalaşan neftin qiyməti dekabrın 8-də 75 dolları, 2022-ci ilin yanvarın 5-də 80 dolları, ötən gün isə 85 dolları ötüb.
Beləliklə, ötən ilin noyabrın sonundan indiyə qədər "Brent” neftinin qiyməti 16 dollar, yəni 23,2 faiz artıb.
Son ay yarımda neft qiymətlərinin belə sürətlə artmasına səbəb kimi dünyada pandemiyanın sona yaxınlaşdığına dair məlumatların yayılması göstərilir. Koronavirusun "Omicron” ştamı yayılandan sonra kütləvi şəkildə qapanmaların olacağına dair gözlənti özünü doğrultmadı. Bununla əlaqədar olaraq neftə tələb güclənir, şirkətlər və investorlar daha çox neft alır. Bu hal neft qiymətlərinin yüksəlməsini dəstəkləyir.
Qeyd edək ki, neftin qiymətinin proqnozlaşdırılan səviyyədən yüksək olması Azərbaycana əlavə qazanclar gətirir. Baha neft həm ixracın artmasına, həm Dövlət Neft Fondunun gəlirlərinin artmasına, həm də dövlət büdcəsinin vergi gəlirlərinin artmasına səbəb olur.
Lakin baha neft digər məhsulların da qiymətini artırır. Bu vəziyyət əmtəə qiymətlərinin bir qədər də yüksəlməsi ilə nəticələnəcək.
Vasif
Sfera.az