Nazirliyin 10 min arı problemi
"Mətbuatda oxudum ki, Kənd Təsərrüfatı Nazirliyi İsmayıllı rayonunun Lahıc qəsəbəsində 10 min baş arı ailəsindən ibarət Arıçılıq Kompleksinin inşa etdirəcək. Burda 2 məsələ diqqətimi çəkdi. Birincisi, Kompleksin Nazirlik tərəfindən yaradılmasının məqsədəuyğunluğu. Yenə də köhnə prinsip davam edir. Dövlət özəl biznesə şərait yaratmaq əvəzinə özü biznesə girişib. Diqqətimi çəkən ikinci məsələ bu layihənin səmərəliliyidir".
Sfera.az xəbər verir ki, bu sözləri iqtisadi ekspert Samir Əliyev deyib.
"Miqyas effekti baxımından 10 min arı ailəsinin bir təsərrüfat altında olması arı məhsullarının maya dəyərini azaldır. Ancaq əsas sual həmin ərazinin 10 min arı ailəsini qida ilə təmin etmək gücündə olması ilə bağlıdır. Vaxtilə təşkilatımız Azərbaycanda qeyri-neft sektorunun inkişafı çərçivəsində arıçılığın inkişafı perspektivləri ilə bağlı araşdırma aparıb. Araşdırma zamanı bu sahənin təkcə iqtisadi yox, həm də ekoloji, sağlamlıq və turizm baxımından nə qədər faydalı olduğunu gördük. Ona görə arıçılıq sahəsi həmişə diqqətimizdədir. Qeyd edim ki, bal arılarının effektiv işləmələri üçün uçuş məsafəsi maksimum 2 km olmalıdır. Bu halda ərazidə kompakt şəkildə 10 min arı ailəsini (hər ailədə on minlərlə arı) təmin edə biləcək meşə, bitki varmı? Bu mal-qara deyil ki, kənardan qida daşıyasan. Arı özü bal üçün nektarı yığıb gətirir. Üstəgəl Lahıcın yerləşdiyi coğrafı ərazi heç də Aran region qədər arılar üçün optimal temperatura malik deyil. Digər tərəfdən bu kompleks bir neçə yüz arı ailəsi olan kiçik arıçılıq təsərrüftlarını sıradan çıxartmayacaq?
Qısası, bu layihənin səmərəli olacağını düşünmürəm".