Məsələ ətrafında Sfera.az-a danışan sosioloq Lalə Mehralı yetkinlik yaxşında olan uşaqların nəzarətə götürülməli olduğunu bildirib. Ekspert aludəçiliyin yaranmasında sosial şəbəkələrin rolunun böyük olduğunu qeyd edib: 

"Gənc nəsil, xüsusilə də 15-17 yaşlı uşaqlarımız bu gün smartfon və internetdən istifadə edə bilirlər və onların sosial şəbəkələrə çıxışları var.

Daxil olduqları hər sosial şəbəkədə bu kəlmənin istifadə olunması ilə bağlı materiallar görürlər. Dolayısıyla onlara bunun nə demək olduğu maraqlı gəlir. Araşdırdıqdan sonra nə olduğunu öyrənir və necə bir şey olmasına maraq göstərirlər. Hər hansı vasitə ilə "patı” adlı məhsulu əldə edirlər, əldə etdikdən sonra dadına baxmağa çalışırlar və beləcə aludəçisi olurlar. Mən xüsusilə yetkinlik yaşında olan uşaqların nəzarətə götürülməsinin tərəfdarıyam".

Sosioloq narkotik maddələrin ziyanlarının tədris sisteminə salınmasının zəruriliyini vurğulayıb:

"Narkotikin fəsadları barədə məlumatları məktəblərdə dərs vəsaitlərinə salmaq və uşaqlara onun yaşatdığı dəhşətləri başa salmaq lazımdır. Bu haqda sənədli filmlər hazırlamaq və sinifdənxaric oxu yolu ilə bəzi məlumatların oxunmasını tədris etmək olar. Bəzən valideynlər deyirlər ki, uşaqların psixologiyasını korlamamaq üçün onlara hər şeyi demək olmaz. Amma məncə az da olsa məlumatlı olsalar, o yanlışa doğru yol almazlar. Onlar mütləq şəkildə bu dəhşəti anlamalıdırlar".