"Moldovada da Azərbaycandakı prosesə presedent olaraq bir şeylərin olacağını gözləyirəm”.

Sfera.az-a açıqlamasında bu sözləri Moldova Prezidenti Mayya Sandunun Dnestryanı bölgədən Rusiya sülhməramlılarının çıxarılması barədə çağırışının Qarabağın azadlığı sədasından ilhamlandığına işarə vurarkən politoloq Cümşüd Nuriyev deyib:

"Artıq bunun ilk nüansları görünməkdədir. Moldovada təbii ki, Sandunu hakimiyyətə gətirənlər var, bunlar Qərb ölkələridir. Onların məqsədi odur ki, bilavasitə NATO xəttilə Rusiya sərhədinə doğru daha da yaxınlaşsınlar.

Ukraynada bu proses uğurla nəticələnmədi. Belarusda ümumiyyətlə alınmadı. Bu fonda çalışacaqlar ki, Dnestyanı əyalətin problemini həll etsinlər. Çünki, Moldova, Ukrayna və Gürcüstan Azərbaycanın həyata keçirdiyi prosesə bir presedent kimi baxırlar. Düşünürlər ki, xalq istəsə onların da problemlərini həll edə bilər”.

Nuriyevin fikrincə, Kreml Moldovada müharibəyə getməyəcək:

"Rusiya axı buradan çox uzaqdadır. Bütün hallarda həmin ərazidən sülhməramlıların çıxması üçün Avropanın təzyiqləri artacaq. ABŞ-da Baydenin gəlişilə Rusiyaya təzyiqlərin artacağı gözləniləndir. Sandunun bu ərəfədə həmin fikirləri səsləndirməsi də məhz həmin təzyiqlərə əsas yaratmağa hesablanıb. Ona görə Moldovada da Azərbaycanda olan prosesin ardınca bir şeylərin olacağını gözləyirəm. Amma tezliklə olmayacaq”.

Elçin

Sfera.az