"Səlahiyyətlərimin icrasına başlayandan bəri Biləsuvar sakinlərindən müxtəlif məzmunlu çoxsaylı şikayətlər almışdım və analoji məktublar bu gün də gəlməkdədir. İstisnasız olaraq bütün şikayətləri aidiyyatı strukturlara araşdırmaq üçün göndərmişəm, göndərməkdəyəm də. Bu mənim Qanun və seçicim qarşısında öhdəliyimdir, Biləsuvar insanın səsi olmaq mənim vəzifə borcumdur”.

Sfera.az xəbər verir ki, bunu millət vəkili Bəhruz Məhərrəmov özünün sosial şəbəkə hesabında yazıb. O eyni zamanda baş verən son həbslərə də münasibətini bildirib:

"Son hadisələrə gəlincə, hakimiyyətin fərqli qollarının nümayəndələri kimi sabiq icra başçısı Mahir Quliyevlə yalnız işgüzar münasibətlərimiz olub. Son həftələrdə isə onun səhhətində ciddi problemlərlə əlaqədar, mənəvi amilləri əsas tutaraq ardıcıl bir neçə dəfə telefonla danışmışdıq. Söhbətlərdə şikayətlərin çoxluğunu onun, habelə İcra hakimiyyətinin digər rəhbər işçilərinin diqqətinə çatdırmışam. Habelə, facebook səhifəmdə canlı yayımlar zamanı mövqeyimi aydın formada ifadə etmişəm.

O ki qaldı, DTX-nın əməliyyatına, məsələ kifayət qədər sadədir, cənab Prezidentin qoyduğu tələblərə məhəl qoymayan, qanunları tapdalayan istənilən dövlət məmuru təbii ki cəzalanacaq. Biləsuvarda da belə oldu, bu işdə nə Deputatın, nə də başqasının rolu olmayıb, bu yalnız və yalnız cənab Prezidentin iradəsidir. Fürsətdən istifadə edib, medianı bu məsələlər ətrafında manipulyasiya etməməyə çağırıram. Başqa şayə və fikirlərə əhəmiyyət verməyin.

İkincisi, bildiyiniz kimi sabiq İcra başçısı barəsində Cinayət Məcəlləsinin 308, 311 və 179-cu maddələrinin müvafiq bəndləri üzrə cinayət işi açılıb, lakin, məhkəmənin yekun hökmü yoxdur, təqsir məhkəmə qaydasında sübut olana qədər ifadələrimizdə ehtiyatlı olaq”.

Millət vəkili sonda qeyd edib ki, pozuntu bir günün işi deyil, problemləri indiyədək yazmaq lazım idi, əks halda, necə deyərlər "daldan atılan daş topuğa dəyər."

"Yıxılanı baltalamaq bizə yaraşmaz, bu ölkədə hüquq var, qanun var, əmin ola bilərsiz ki, kimliyindən asılı olmayaraq əli xalqın cibinə girmiş hər kəs əməlinə görə zatən cəzasını alacaq. Mənim buna inancım sonsuzdur və əminliyimin kökündə Azərbaycan Prezidentinin mövcud siyasi xətti və iradəsi dayanır”.