Mərkəzi Bankdan inflyasiya AÇIQLAMASI: “Əhəmiyyətli risklər...”
11:28 / 03.05.2021
2157
Azərbaycan Mərkəzi Bankı inflyasiyanı hədəfdən kənarlaşdıra biləcək daimi və əhəmiyyətli riskləri müşahidə etmir.
Sfera.az Mərkəzi Banka istinadən bildirir ki, bu il ölkəmizdə məcmu tələb artır. Amma tələbdəki artım təklifi üstələmədiyindən onun inflyasiya üzərində təsiri neytraldır.
Azərbaycanda tələbi əsasən xərc amilləri artırır. Dünya ərzaq bazarında bahalaşmanın davam etməsi, eləcə də digər xərc amilləri ilin qalan dövründə də qiymətlərə və inflyasiya gözləntilərinə artırıcı təsir göstərəcək. Buna baxmayaraq Mərkəzi Bank hesab edir ki, tələbdəki artım risklər balansını əhəmiyyətli dəyişmək potensialına malik deyil.
Xatırladaq ki, martda illik inflyasiya 4,1 faiz olub. İnflyasiyanın dinamikası əsasən qeyri-monetar xarakterli faktorlardan təsirlənir. Dövlət tərəfindən tənzimlənən qiymətlər, həmçinin mövsümə həssas kənd təsərrüfatı məhsulları nəzərə alınmadan hesablanan orta illik baza inflyasiya 2021-ci ilin yanvar-mart aylarında 2,2% təşkil edib.
Mərkəzi Bank bildirir ki, son bir neçə ayda faktiki inflyasiyanın dinamikası inflyasiya gözləntilərinə də təsir edir. Real sektor üzrə monitorinqə görə martda inflyasiya gözləntiləri qeyri-neft sənayesi, ticarət və tikintidə artıb, xidmət sektorunda isə azalıb. Ev təsərrüfatları arasında martda keçirilmiş sorğulara görə respondentlərin cəmi 25%-i inflyasiyanın yüksələcəyini gözləyir.
Apreldə yenilənən proqnozlara görə 2021-ci ilin sonuna illik inflyasiya hədəf diapozonunda formalaşacaq.
Vasif
Sfera.az