Sfera.az bildirir ki, AMB ötən ilin dekabrında ehtiyatlarını daha 56,7 milyon dollar artırıb. Bir il ərzində isə ehtiyatlarda artım 706 milyon dollar və ya 11,1 faiz olub.

Ötən il artımın böyük olması avqust ayında kvotaya uyğun BVF-nin SDR bölgüsü çərçivəsində Azərbaycanın SDR limitinin artırılması ilə bağlıdır. Bunun sayəsində avqustda ehtiyatlar 546 milyon dollar artıb.

Xatırladaq ki, AMB-nin ehtiyatları 2020-ci ildə 111 milyon dollar, 2019-cu ildə 632 milyon dollar, 2018-ci ildə 292 milyon dollar, 2017-ci ildə 1,361 milyard dollar artıb.

Valyuta ehtiyatlarının həcmində ən yüksək göstərici 2014-cü ilin avqustunun əvvəlində qeydə alınıb. Həmin tarixdə AMB-nin ehtiyatlarının həcmi 15,193 milyard dolları ötmüşdü. Sonradan ehtiyatların həcmi davamlı azalaraq 2016-cı ilin sonunda 3,974 milyard dollara düşdü.

2022-ci ilin əvvəlində qeydə alınan göstərici ilə 2016-cı ilin sonunundakı göstəricinin müqayisəsinə əsasən deyə bilərik ki, AMB-nin valyuta ehtiyatları son 5 ildə 3,101 milyard dollar və ya 78 faiz artıb.