Çinin kosmonavtları Yerə qayıdıb - FOTO

Çin İnsanlı Kosmik Proqramı çərçivəsində kosmosa göndərilən “Şençjou-19” ekipajı Yerə uğurla qayıdıb. 

Sfera.az xarici mediaya istinadən xəbər verir ki, üç taikonavt, Cay Şüçı, Sonq Linqdunq və Vanq Haotszını daşıyan kapsul bu gün səhər saatlarında Daxili Monqolustan Muxtar Bölgəsində yerləşən Donfenq sahəsinə enib.

Çin İnsanlı Kosmik Proqramı Agentliyinin (CMSA) açıqlamasında bildirilib ki, taikonavtlar 7,5 saatlıq uçuşdan sonra Yerə çatıb. Kapsul orbit ətrafında 5 dövrə vurduqdan sonra uğurla eniş həyata keçirib.

Ekipaj 2024-cü il oktyabrın 30-da “Şençjou-19” kosmik gəmisi ilə fəzaya göndərilmiş və Tianqonq kosmik stansiyasında fəaliyyət göstərən 8-ci heyət olmuşdu. Onlar ötən həftə “Şençjou-20” ilə stansiyaya gələn yeni ekipaj – Çın Donq, Çın Conqrui və Vanq Tsieyə vəzifələrini təhvil verərək Yerə dönüş hazırlıqlarına başlamışdılar.
Qeyd edək ki, taikonavtların dönüşü ilkin olaraq dünənə planlaşdırılsa da, eniş bölgəsindəki əlverişsiz hava şəraiti səbəbilə bu günə təxirə salınmışdı.

Bəsti Rəfizadə
Sfera.az