Sfera.az xəbər verir ki, ilkin məlumata görə, təxminən 40 yaşında olan Fərziyeva Zəkifə Firuz qızı dünən gündüz saatlarında  evdə tək olub. O, boğazından 7 bıçaq zərbəsi vurulduqdan sonra başı kəsilərək qətlə yetirilib.

Z.Fərziyevanın üç oğlu var. Bir oğlu hazırda hərbi xidmətdədir, digəri isə Bakıda işləyir. Bir müddət öncə hərbi xidmətdən qayıdan üçüncü oğlu isə onunla birgə yaşayır. Hadisə vaxtı həmin oğlanın meşədə olduğu bildirilir. 

İlkin istintaqla bağlı iki kənd sakini və qadının onunla birgə yaşayan oğlu ifadələri alınmaq məqsədilə prokurorluğa aparılıb.

Z.Fərziyevanın həyat yoldaşı isə uzun müddətdir Rusiyada yaşayır.

Faktla bağlı araşdırma aparılır, qadını kimin qətlə yetirdiyi isə hələlik məlum deyil.

***

Lerik rayon prokurorluğu da hadisə ilə bağlı məlumat yayıb. Qeyd edilir ki, hadisə aprelin 28-də saat 16 radələrində Lerik rayonunun Barzavu kəndində qeydə alınıb. Faktla bağlı Lerik rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib. // "Qafqazinfo”