Bu sözləri Sfera.az-a açıqlamasında Ermənistanla Xankəndini birləşdirən Laçın dəhlizinə nəzarəti Rusiya sülhməramlılarının təkbaşına deyil, Azərbaycanla birlikdə həyata keçirməsi zəruriliyinə toxunarkən, QAFSAM-ın rəhbəri Araz Aslanlı deyib.

Həmsöhbətimiz düşünür ki, Laçın dəhlizi ifadəsindən istifadə edilməməlidir: "Bir ölkənin daxilində onun bir hissəsindən digər hissəsinə dəhliz olmaz. Azərbaycandan keçən hər hansı bir yol Ermənistanla Rusiyanı birləşdirsəydi, burada bəlkə də hansısa koridordan danışmaq olardı. Amma ölkə daxilində  beynəlxalq hüququn subyekti olmayan, sadəcə bir dövlət içində olan inzibati ərazi vahidin birindən digərinə aparan yolu dəhliz adlandırmamalıyıq”.

Politoloq hesab edir ki, Azərbaycanın mütləq suverenliyi altında olan bir ərazidə birmənalı olaraq Azərbaycanın nəzarəti olmalıdır: "Söhbət həm Ermənistan Azərbaycan sərhədinin Laçındakı hissəsindən, həm də bu sərhədlə Xankəndini birləşdirən və ölkəmizə aid olan yoldan gedir. Aydındır ki, müəyyən geosiyasi səbəblərdən,  müharibədən sonrakı dövrün xüsusi şərtlərindən irəli gələrək sözügedən ərazi hələlik Bakının nəzarətində deyil. Bunu müəyyən dövr üçün bir qədər anlamaq olar. Lakin bu halda da həmin ərazidə hansısa xarici hərbi qüvvə təkbaşına olmamalıdır”.

 

 

Elçin