Kür çayının səviyyəsi qalxır – Ətraf ərazilər su altında qala bilərmi?
"Qalxma davam edərsə, qurunt sularının səviyyəsi də qalxacaq. Bu da Salyan istiqamətində ətraf ərazilərə müəyyən fəsadlar yarada bilər”.
Bu sözləri Sfera.az-a açıqlamasında son ay ərzində Kür çayında suyun səviyyəsinin 3,2 metr qalxmasının səbəbləri və fəsadları barədə danışarkən Coğrafiya İnstitutunun əməkdaşı Ənvər Əliyev deyib:
"Çayda su rejimi artıb. Bir ara dağlara güclü qar yağdı, hava şəraiti isə elə də soyuq deyil.Nəticədə dağlardakı qarın əriməsilə Kürün suyu çoxalıb. Türkiyə, Ermənistan tərəfdə hazırda qar örtüyündə ərimələr gedir. Salyan tərəfdə isə Kürün deltasında çoxlu yığıntılar var. Kürün səviyyəsinin əvvəllər az olması həmin ərazidə çoxlu çöküntü materiallarının toplanmasına səbəb olmuşdu. İndiki halda həmin ərazidə suyun səviyyəsinin qalxmasının əsas səbəbi məhz Kürün deltasında olan çöküntülərin toplanması ilə bağlıdır”.
Həmsöhbətimiz çayın səviyyəsinin 3,2 metr qalxmasının ətraf üçün elə də təhlükəli olmadığı qənaətindədir:
"Səviyyənin 3,2 metr qalxmasının fəsadlarına gəldikdə, bu Kürün hansı nöqtəyə qədər qalxmasından asılıdır. İndiki halda, elə də ciddi təhlükə görmürəm. Çayın hündürlüyü qalxsa da, səviyyəsi ola bilsin əvvəlki normalməcraya çatıb.
Qalxma davam edərsə, qurunt sularının səviyyəsi də qalxacaq. Bu da Salyan istiqamətində ətraf ərazilərə müəyyən fəsadlar yarada bilər”.
Elçin
Sfera.az