Əslən Ağdam rayonundan olan Azərbaycan vətəndaşı Səbuhi Həsənov Azərbaycan vətəndaşı olan başqa bir şəxsi aldadaraq 677 min ABŞ dollarını mənimsəyib.

Bununla bağlı iddia Sfera.az-a daxil olub.

Şikayətə əsasən, Səbuhi Həsənov "Moskva" univermağında qızıl-zinət əşyalarının ticarəti ilə məşğul olur.

Özünü Səbuhi Ağdamski kimi təqdim edən şəxs həmkarlarının etimadını qazanaraq, sadəcə 1 şəxsdən dəyəri 677 min ABŞ dolları məbləğində vəsaitini mənimsəmişdir.

Zərərçəkənin sözlərinə görə, o, dəfələrlə pulunu geri tələb etsə də, Səbuhi Həsənov borcu qaytarmaqdan imtina edib.

Səbuhi Heseynov özü telefon yazışmalarında və digər sənədlərdə borcun mövcudluğunu etiraf etmiş, lakin qaytarmaqdan boyun qaçırmışdır.

Bu iddia ilə bağlı saytımıza açıqlama verən vəkil Turan Abdullazadə qeyd etdi ki, bu cür faktlar dələduzluq əməli kimi tövsif edilir.

Vəkil dedi ki, Azərbaycan qanunvericiliyində başqasına məxsus əmlakı və ya əmlaka olan hüquqları aldatma və ya etibardan sui-istifadə yolu ilə ələ keçirmə kimi izah olunur:

“Sadə dillə desək, bir şəxsə qarşı tərəfi qəsdən aldadaraq və ya onun etibarından istifadə edərək pulunu, əmlakını və ya maddi dəyəri olan hər hansı şeyi ələ keçirirsə, bu, dələduzluq hesab edilir. Təqdim olunan faktlar təsdiq olunarsa və məbləğ xüsusilə külli miqdarda sayılarsa, bu, ağır tərkibli cinayət əməli kimi qiymətləndirilir. Qanunvericiliyə əsasən, “xüsusilə külli miqdar” dedikdə beş yüz min manatdan yuxarı məbləğ başa düşülür.

CM-nin 178.4-cü maddəsinə görə isə bu əməllə xüsusilə külli miqdarda ziyan vurmaqla törədilən dələduzluq 10 ildən 14 ilə qədər azadlıqdan məhrumetmə ilə cəzalandırılır.

Əgər zərərçəkənin əlində yazışmalar, pulköçürmə sənədləri, səsli və ya yazılı sübutlar varsa, bunlar cinayət işinin başlanması və ittihamın sübuta yetirilməsi üçün mühüm əhəmiyyət daşıyır”.

Mütəxəssislər qeyd edirlər ki, bu cür külli miqyaslı dələduzluq hadisələri heç vaxt izsiz qalmır. Xüsusilə də 677 min dollar kimi ciddi məbləğin mənimsənilməsi cinayət işinin “adi prosedur” deyil, dövlət tərəfindən prioritet istintaq predmeti kimi qəbul olunmasına səbəb olur. Bu məbləğli dələduzluq əməlləri hüquq-mühafizə orqanlarında avtomatik olaraq xüsusi nəzarətə götürülür və belə işlərdə gizlənmək, məsuliyyətdən yayınmaq mümkün olmur.

CM-nin 178.4-cü maddəsi ilə açılan işlərdə şübhəli şəxsin məsuliyyətdən qurtulması praktiki olaraq mümkün deyil. Sübutlar hamısı bir sıraya düzülərək şəxsin üzərində dəmir kimi ağır bir “cinayət zənciri” yaradır. Bu zənciri qırmaq mümkün olmur. İstintaq orqanlarının sözlərinə görə, xüsusilə bu miqyasda dələduzluq edən şəxslərin sonradan harada işləməsinin, harada gizlənməsinin heç bir əhəmiyyəti olmur. Belə işlərdə şəxs gec-tez tapılır və məsuliyyətdən yayınmaq şansı sıfıra bərabərdir.

Ən vacib məqam isə budur ki, xüsusilə külli miqdarda dələduzluq işləri cinayətkarın həyatını tamamilə dəyişdirən qərarla nəticələnir.

10 ildən 14 ilə qədər azadlıqdan məhrumetmə cəzası bütün sosial əlaqələrin qırılması, illərlə cəmiyyətdən təcrid olunmaq, işini, adını, nüfuzunu tamamilə itirmək deməkdir. Mütəxəssislər bildirirlər ki, bu maddə ilə həbs olunanların böyük qismi sonradan cəmiyyətə qayıtdıqda belə özlərinə əvvəlki həyatı qura bilmir.

Zərərçəkən açıqlamasında vurğulayıb ki, o, təkcə pulunu deyil, başına gətirilən bu zülmün hesabını tələb edir:

“Mənim haqqım yeyilib, həyatım alt-üst edilib. Mən bu işin sonuna qədər gedəcəyəm. Kim nə qədər gizlənsə də, qanun bir gün tapır”.

Belə hallarda zərərçəkənlər uzun müddət psixoloji əzab, əsəb pozuntuları yaşayır. Onların keçdiyi yol sadəcə maddi deyil, ruhi fəlakətdir. Bu səbəbdən də, bu iş artıq sadə bir şikayət yox, tammiqyaslı cinayət təqibi mərhələsinə keçmiş sayılır.

Bu səviyyədə dələduzluq edən şəxs üçün geri dönüş yolu qalmır. Cinayət işinin gedişi hər addımı ilə onu hüquqi nəticədən qaça bilməyəcəyi reallığı ilə üz-üzə qoyur.

Ağdamlı Səbuhi həbs edilə bilər - Külli miqdarda maliyyə skandalı - İDDİA