Kreml ABŞ-ı “arxa bağçası”na soxulacağı ilə hədələdi – Kuba və Venesuela şantajı işə yarayacaqmı?
13:03 / 15.01.2022
1052
"Rusiya
xarici işlər nazirinin müavini Sergey Ryabkov deyib ki, Moskva onun təhlükəsizlik
təkliflərini rədd edən ABŞ və NATO-ya qarşı Kuba və Venesuelada qoşun yerləşdirə
bilər. Kremlin xarici siyasətinin əsas isimlərindən olan Ryabkov demək istəyib
ki, Vaşinqton və Brüssel Ukrayna ilə bağlı Moskvanın tələblərini yerinə yetirməsə,
Rusiya ABŞ-ın yaxınlığında hərbi bazalar və ya orta mənzilli raketlər yerləşdirəcək”.
Sfera.az xəbər verir ki, bunu politoloq Elxan
Şahinoğlu deyib. Politoloq hesab edir ki, Kremlin mesajı aydındır:
"Mesaj budur - sən mənim arxa bağçamda hərbi
bazalar yerləşdirəcəksənsə, mən də sənin arxa bağçanda hərbi bazalar yerləşdirəcəm.
Rusiya özünü yenə Amerika ilə müqayisə edir. Birincisi, Kiyev özü istəyir ki,
Ukrayna NATO-nun üzvü olsun, ölkədə Amerikanın hərbi bazaları yerləşdirilsin.
Kuba və Venesuelanın Rusiya hərbi bazalarının yerləşdirilməsi ilə bağlı istəyi
səslənibmi, yoxsa Kreml bu ölkələrin əvəzinə danışır? İkincisi, keçmiş SSRİ bir
dəfə Amerikanın yan-yörəsində - Kubada nüvə başlığı daşıya bilən raketlər yerləşdirmək
istədi, Vaşinqtonun təzyiqi nəticəsində raketlərini yığışdırdı.
Eyni tale
Rusiyanı da gözləyir. Kubada rejim əvvəlki olsa da, fiqurlar dəyişib və yeni
simalar çətin ki, Rusiyanın raketlərinə görə ABŞ-la münasibətləri indikindən
daha çətin vəziyyətə sürüklənməkdə maraqlı olsun. Elə Venesuelanın özü də ağır
vəziyyətdədir, iqtisadi göstəriciləri yerlə sürünür, müxalifət zaman-zaman
hakimiyyəti sıxışdırır. Belə olan halda Venesueladakı solçu rejim Rusiyanın
raketlərinə görə daxildə və xaricdə əlavə gərginliklə üzləşmək istəyərmi?”
Turan Rzayev
