Belə ki, koronavirus statistikasında ilk onluqda olan bu ölkədə indiyədək 1,622,632 nəfər virusa yoluxub, 44037 nəfər dünyasını dəyişib.

Hələ bir neçə ay əvvəl virusun Azərbaycanda yayıldığı ilk vaxtlarda xarici ölkələrdən vətəndaşlarımızın gətirilməsi üçün çarter reyslər təşkil olunsa da İspaniyadan Azərbaycana bu reyslər təyin edilmədi.

Maraqlıdır, bu qədər zaman ərzində İspaniyada qalan vətəndaşlarımız arasında virusa yoluxan varmı? Soydaşlarımızın yaşam şəraiti necədir?

Məsələ ilə bağlı Sfera.az-a danışan "Barselonadakı Azərbaycanlılar Cəmiyyəti”nin sədri və İspaniya Azərbaycan Evinin rəhbəri Kərim Kərimov vətəndaşlarımız arasında koronavirusa yoluxma faktının olmadığını bildirib:

"İspaniyaya pandemiya müddətində Azərbaycana çarter reys açılmadı. Amma indiyə kimi artıq qayıtmaq istəyənlər müxtəlif yollarla qayıdıb. İspaniyada hazırda yaşayan azərbaycanlılar əsasən burda uzun illərdir ki, yaşayan həmyerlilərimizdir. Bu baxımdan onların heç birində yaşayış və ya maddi vəziyyətlə bağlı sıxıntı yoxdur.

Bizdə olan məlumata əsasən indiyədək İspaniyada yaşayan soydaşlarımız arasında koronavirusa yoluxma halı qeydə alınmayıb", - deyə diaspor rəsmisi qeyd edib.

Sfera.az

Əzizə Zeynal