Koronavirusdan sağalanlar yeni mutasiyalara yoluxa bilər - Həkimdən XƏBƏRDARLIQ
12:53 / 11.06.2021
2409
Yay mövsümü yaxınlaşdıqca turizm, başqa ölkələrə səyahət məsələsi də aktuallaşır. Ancaq xəstələnib sağalan insanlar səyahət zamanı koronavirusun yeni mutasiyalarına yoluxmaqdan ehtiyyat edirlər.
Bəs, bu narahatlıqların əsası varmı? COVID-19 olub sağalan şəxs yeni mutasiyalara yoluxa və xəstəliyi ağır keçirə bilərmi?
Mövcud sual ətrafında Sfera.az-a danışan Azərbaycan Tibb Universitetinin müəllimi, cərrah Rauf Qasımov immunoqlobulin sayının belə məqamlarda önəmli olduğunu bildirib:
"Əgər COVID-19-a yoluxmuş şəxsdə immunoqlobulin yüksəkdirsə, onda yeni mutasiyaya yoluxma ehtimalı cüzi olur. Bu vəziyyət vaksin olunmuş şəxsdə də belədir. Yəni koronavirus əleyhinə peyvənd olunan şəxsin yeni ştammlara yoluxma riski aşağıdır. İnsanda immunitet formalaşıbsa, immunoqlobulin G yüksəkdirsə, o zaman yoluxma 0-a bərabər olur. Lakin bədən immunoqlobulini aşağı olan şəxslər yeni növ ştammlara yoluxa bilər. Bu baxımdan immunoqlobinin sayını öyrənmək mühümdür".
R.Əliyev yeni ştamma yoluxan şəxslərin xəstəliyi hansı şəkildə keçirməsindən də danışıb:
"COVID-19 xəstəliyini keçirib, yeni ştamma yoluxan şəxslərdə xəstəliyin inkişafı yenə immunoqlobinin bağlı olan məsələdir. Yəni immunoqlobinin sayı bədəndə normal olarsa, bu zaman xəstəlik də yüngül keçir, əks halda isə şəxs xəstəliyi ağır keçirəcək. Bu baxımdan xüsusilə səyahət etməzdən əvvəl insanların müayinə olunması yaxşı olardı".
Əzizə Zeynal
Sfera.az
