Məlum olduğu kimi könüllülük fəaliyyəti bir çox sahələrdə geniş yayılmışdır. Könüllü olmaq, cəmiyyətimizin həssas təbəqəsindən olan insanlara kömək etmək yolunda atılan bir addımdır ki, bu da insanpərvərliyin bir göstəricisidir.

Cəmiyyətin tərəqqisi, gənclərimizin dünyagörüşünün artırılması, onların potensialını nəzərə alaraq respublikamızın müxtəlif sahələrində fəaliyyət göstərməsi və təkmilləşməsi üçün cənab prezident İlham Əliyev 2020-ci ili "Könüllülər ili” elan etmişdir. Gənclər də gərək bu könüllülük fəaliyyətinin əslində bir dəyər olduğunu və bu dəyəri saxlamanın vacibliyini dərk etsinlər.

Könüllüllük gənclərə öz potensialını, bacarıq və qabiliyyətlərini üzə çıxartmaq və onun daha da təkmilləşməsi yolunda bir istiqamətdir. Mən də könüllülük fəaliyyəti ilə məşğul olan bir gənc olaraq düşünürəm ki, gənclər müxtəlif iqtisadi, siyasi, sosial sahələrdə könüllü olaraq daha çox inkişaf edə bilərlər və onların inkişaf etməsi respublikamızın inkişaf etməsi deməkdir.

Könüllülük gənclərdə təcrübə formalaşdırır, onların özgüvənini artıraraq daha da irəliləməsinə şərait yaradır. Azərbaycan gəncləri hər zaman bacarıqlıdır,fəaldır. Onlar daim öz fəallığı ilə seçilmiş, xalqımız, respublikamız üçün faydalı işlər görməyə çalışmışlar. Könüllülük əvəzi ödənilməyən bir fəaliyyət növüdür ki, gənclər müxtəlif qurumlara, beynəlxalq, ictimai təşkilatlara qoşularaq öz potensiallarını daha da artıra bilərlər. Gənclər bu fəaliyyətə daha çox yönəldikcə müxtəlif qurumlarda, sahələrdə işin gedişatını da öyrənmiş olurlar və bu da gələcəkdə onlara uğurlu karyera qurmaqda yardımçı olur.

Hal-hazırda hökm sürən koronavirus pandemiyası ilə əlaqədar olaraq yaşlı təbəqədən olan insanlara daha həssas yanaşılmışdır. Könüllülərimiz təmənnasız olaraq öz istəyi ilə onlara lazımi ərzaq, dərman maddələrinin alınmasında, onların lazımi ünvana çatdırılmasında, təmizlik işlərinin aparılmasında yaxından iştirak etmişlər. Onlar keçirilən müxtəlif tədbir və konfranslarda respublikamızı layiqincə təmsil edirlər.

Son bir ildə Prezident İlham Əliyevin rəhbərliyi ilə aparılan struktur islahatlarının əsas məqsədi idarəetmədə çevikliyi və səmərəliliyi artırmaq, cəmiyyətdə formalaşan yeni çağırışlara və iqtisadiyyatda baş verən struktur dəyişikliklərinə adekvat uyğunlaşmanı təmin etməkdir. Və bununla bərabər aparılan kadr islahatları dövlət idarəçiliyi sistemini daim təkmilləşdirir. Ölkədə aparılan kadr islahatlarını davam etdirmək məqsədilə son günlər cənab prezidentin imzaladığı sərəncamlar da ictimaiyyət tərəfindən böyük razılıq və məmnunluqla qarşılanmışdır. Bu istiqamətdə düşünülmüş, ölçülüb-biçilmiş addımlar atılmaqdadır və bu zaman, ilk növbədə, xalqın və dövlətin maraqları, milli mənafeləri nəzərə alınır.