Tarif Şurası vətəndaşı nə qədər ziyana salıb? - 2 dəfə çox xərcləyəcəyik
13:12 / 01.02.2021
1796
Əhali istehlak qrupu üçün satılan suyun qiymətinin
artırılması ümumi xərclərdə kommunal xidmət xərclərinin payının artmasına səbəb
olacaq. Son 20 ilin təhlili göstərir ki, su, işıq, qaz və digər yanacaq növlərinin
tədricən bahalaşması hesabına onlara çəkilən xərcin ümumi xərclərdə payı 2 dəfəyə
yaxın artıb.
Sfera.az xatırladır ki, 2001-ci ildə əhali hər ay
adambaşına kommunal xidmətlərə 1,5 manat xərcləyib. Həmin ildə kommunal xidmətin
əldə edilməsinə çəkilən xərc ümumi xərclərin 4,71 faizini təşkil edirdi. Başqa
sözlə hər ay adambaşına 100 manat xərclənirdisə, bunun 4,71 manatı kommunal
xidmətlərin alınmasına sərf olunurdu. 2005-ci ildə kommunal xidmət xərclərinin
ümumi xərclərdə payı 6 faizi, 2011-ci ildə 7 faizi ötdü.
2001-ci illə müqayisədə kommunal xərclərin payının artması
xidmət növlərinin bahalaşması ilə bağlıdır. Əvvəllər kommunal xidmət tarifləri
çox aşağı olduğundan əhalinin xərclərində onun payı nəzərə çarpmırdı. Lakin
sonrakı illərdə xidmətlərin genişləndirilməsi və keyfiyyətin artırılması qiymətlərin
də artımını zəruri etdi.
2015-ci ildə baş verən 2 böyük devalvasiyadan sonra
kommunal xidmət növlərinin qiymətinə yenidən baxıldı. Əhali qrupuna aid olan
istehlakçılar üçün 2016-cı ildə elektrik enerjisinin və suyun qiyməti, 2017-ci
ildə qazın qiyməti artırıldı.
Bu artımlardan sonra adambaşına düşən xərclərdə
kommunal xidmətlərin alınmasına çəkilən xərcin payı 7,5 faizlik həddi ötdü.
2019-cu ilin məlumatına əsasən əhali adambaşına kommunal xidmətlərə 22,6 manat
xərcləyib ki, bu da cəmi istehlak xərclərinin 7,6 faizi qədərindədir.
2021-ci ilin fevralın 1-dən suyun qiymətinin 2 dəfə
artırılmasından sonra kommunal xidmət xərclərinin payının bir qədər də yüksəlməsini
proqnozlaşdırmaq olar. Normativlərə əsasən bir nəfər ay ərzində 5 kubmetr sudan
istifadə edir. Su istehlakına uyğun olaraq bir o qədər də çirki su kanalizasiya
sisteminə axıdılır. Ümumilikdə bir nəfər ay ərzində 10 kubmetr təmiz və çirkli
su istehlak etmiş olur. Əvvəllər bu qədər suyun istifadəsinə görə ayda
adambaşına 5 manat ödənilirdisə, fevraldan 10 manat ödəniləcək. Əhalinin su
istehlakının sabit qalacağını nəzərə alsaq, suyun və kanalizasiya xidmətinin 2
dəfə bahalaşması hesabına əhalinin adambaşına düşən kommunal xidmət xərcləri ən
azı 5 manat artaraq 27,6 manata yüksələcək.
Vasif
Sfera.az