Köçəryanın deputat mandatından imtinası nəyi dəyişəcək? – Şərh
12:38 / 20.07.2021
913
"Köçəryanın bu addımı nə ona hansısa divident
gətirəcək, nə də Paşinyan hakimiyyətinə maneəçilik yaradacaq”.
Bu sözləri Sfera.az-a açıqlamasında Ermənistanın
keçmiş prezidenti Robert Koçaryanın deputat mandatından imtina etməsinin mümkün
nəticələrini şərh edərkən politoloq Əlimusa İbrahimov deyib:
"Köçəryanın mandatdan imtinası onun reytinqinə
mənfi təsir göstərəcək. Çünki onun bu addımı mövcud qarşıdurmanı gücləndirməyə
hesablanmış təxribat xarakterli hərəkətdir. Bu addımı ilə o tək özünün deyil,
parlamentdə təmsil olunan deputat blokuna və "Qarabağ klanı”na mənfi münasibətin
daha da artmasına rəvac verəcək”.
Həmsöhbətimiz xatırladıb ki, Koçaryan mandatdan
imtina etsə də rəhbərlik etdiyi blok parlamentdə qalır:
"Koçaryan sıravi
deputat olmağı özünə sıxışdırmadığından belə addım atıb. Çünki sıravi deputat
olmaq, həm də Paşinyanın hakimiyyətini qəbul etmək demək idi. Bununla o, eyni
zamanda Paşinyana qarşı mübarizəsini davam etdirəcəyi mesajını verdi.
Bildiyiniz kimi, Rusiyanın təzyiqi nəticəsində Paşinyan onu həbsdə saxlaya bilmədi.
Düzdür, Koçaryanın hələlik qarşıda hansı addımlar atmaqla bağlı konkret
proqramı yoxdur. Mübarizəsini müxalifətçi kimi davam etdirəcək, kənardan
parlamentdəki blokunu idarə edəcək. Özü də Koçaryan mandatdan komandası
hakimiyyətdə yetərincə təmsil olunmadığı tam aydınlaşandan sonra imtina edib.
Rusiyanın təzyiqilə mühüm "rıçaq”lara sahib ola biləcəyini gözləyirdi. Amma bu
baş vermədiyindən mandatdan imtina etdi. Koçaryan uduzmuş fiqurdur”.