"Hələlik belə bir qadağanın tətbiqi gündəmdə deyil”.

Sfera.az-a açıqlamasında bu sözləri Türkiyənin əksər şəhərlərində istirahət və bayram günləri bütün vətəndaşlar üçün küçəyə çıxmaq qadağasının mövcudluğu fonunda virusa yoluxanların artması səbəbindən Azərbaycanda da həmin təcrübənin tətbiqi mümkünlüyünə toxunarkən Səhiyyə Nazirliyinin baş infeksionisti Cəlal İsayev deyib:

"Hər bir ölkə koronavirusla bağlı mübarizədə mövcud vəziyyətə uyğun olaraq özünəməxsus tədbirlər görür. Proses öncədən təhlil edilir və sonra pandemiyaya qarşı müvafiq tədbirlər hazırlanır. Azərbaycanda isə görünür hələlik, istirahət və bayram günləri insanların küçələrə çıxmasının qadağan edilməsinə ehtiyac yoxdur. Ona görə də hələlik belə bir qadağanın tətbiqi gündəmdə deyil”.

Aparılan təhlillər gərgin vəziyyətin yarandığını göstərərsə sözügedən qadağanın tətbiqi mümkün görünür: "Hər şey situasiyadan asılıdır. Aparılan təhlillər vəziyyətin ağır olduğunu göstərsə, onda bu istiqamətdə qərar verilə bilər. Belə bir qərarın verilməsi bir adamın iradəsindən asılı deyil, bu sayaq qərarlar kollegial şəkildə verilməlidir. Mütəxəssislər toplanmalı, hadisələri təhlil etməli və qərar verməlidirlər”.

Elçin

Sfera.az