\"İsgəndər” raketləri ermənilərin əlinə necə keçib? - Rusiya Federal Təhlükəsizlik Xidmətinin açıqlamasına reaksiyalar
14:34 / 05.04.2021
1948
"Problemli və ciddi məsələdir. Rusiya tərəfinin
bu açıqlamasından bir şey anlamadım.
Artıq Rusiyada bu barədə cinayət işi qaldırılıb, istintaq gedir”.
Bu sözləri Sfera.az-a açıqlamasında Rusiya
Federal Təhlükəsizlik Xidmətinin Şuşada tapılan "İsgəndər-M” raketinin
qalıqları ilə bağlı başlanan istintaq fonunda raketin erməni diasporunun liderləri
vasitəsilə ölkənin Cənub Hərbi Dairəsindən qanunsuz yolla alınaraq Qarabağa
göndərilməsi barədə verdikləri açıqlamaya münasibət bildirərkən hərbçi ekspert
İbrahim Rüstəmli deyib:
"İsgəndər”
raketləri dəyəri milyonlarla dollar ölçülən silahdır. Bu silah Rusiya cəbhəxanasının brendidir. Düşünürəm
ki, təhlükəsizlik və məxfilik baxımından burada ciddi izolyasiya sistemi var. Bu
raketlər kifayət qədər ciddi mühafizə olunur.
5-10 qutu avtomat silah deyil ki, kimsə maşının yük yerində harasa
aparsın. Ona görə də Rusiya tərəfindən
"İsgəndər-M” raketləri ilə bağlı deyilənləri ciddi qəbul etmirəm. Erməni
lobbisinin bu silahları asanca götürüb aparması ağlabatan deyil. Hər halda
hadisələrin sonunu gözləməliyik”.
Politoloq Fərhad Mehdiyev də hesab edir ki, həmin
silahların nəzarətdən kənar satılması inandırıcı deyil: "Təbii ki, Rusiya tərəfindən açıqlanan fikirlər
inandırıcı görünmür. Çünki həmin inventarın belə çox rahat itirilməsi ağlabatan
deyil. Atılan raketlərin qalıqları göstərir
ki, bu raketlər qadağan olunmuş raketlərdir. Bu raketləri erməni diasporası
alıbsa da, onlar həmin pulu Rusiya hökumətinə verib. Yəni, həmin silahların nəzarətdən
kənar satılması inandırıcı deyil”.
ASDP sədri Araz Əlizadə hesab edir ki, verilən
açıqlamada məqsəd məsuliyyəti üzərlərindən atmaqdır: "Rusiya Müdafiə Nazirliyinin sözçüsü general
Gerasimov əvvəl deyirdi ki, onlarda olan
bütün "İsgəndər” raketləri anbarlardadır. Rusiya hakimiyyətində gözəl bilirlər
ki, bu raketləri Ermənistana özləri ötürüblər. Belə olmasaydı deyərdilər ki, xəbərimiz
yoxdur. Bu cür açıqlama verməkdə məqsədləri məsuliyyəti öz üzərlərindən
atmaqdır. Həmin hadisə göstərir ki, əyri yollarla həmin ölkədən "İsgəndər”
raketləri almaq mümkündür”.