İşğaldan azad edilmiş ərazilərimizlə bağlı beynəlxalq donor konfrans keçiriləcəkmi? – Rəylər
13:35 / 15.04.2021
1104
"Niyə Ermənistan işğaldan azad edilmiş ərazilərimizlə
bağlı beynəlxalq donor konfransının keçirilməsinə qarşı çıxır? Aydındır ki,
beynəlxalq humanitar strukturların situasiya, qiymətləndirmə hesabatları azad
edilmiş ərazilərdəki işğalçıların vəhşiliyinin faktiki sübutu ola bilər”.
Sfera.az-ın məlumatına görə, bunu sabiq Xarici
işlər naziri Tofiq Zülfüqarov deyib. O bildirib ki, donor konfransı çağırılmadan əhəmiyyətli beynəlxalq
yardım cəlb etmək mümkün deyil.
Milli Məclisin deputatı, politoloq Rasim Musabəyov
isə donor məsələsi ilə bağlı düşünür ki, ermənilər belə bir konfransa maraqlı
deyil.
"İşğaldan azad olunmuş ərazilərdə ermənilərin
barbar davranışları beynəlxalq ictimaiyyətə açıqlandı. Azərbaycan donor
yardımlarına çox güvənməməlidir. Dünya Bankı, Asiya və İslam bankları, digər özəl
investisiyalardan kifayət qədər dəstəyimiz var və neftimizin bir barreli 60
dollardan yuxarıdır. Beləliklə bərpa işlərinə sərf ediləcək əlavə mənbələrimiz
olacaq” – deyə, millət vəkili vurğulayıb.
"Hesab edirəm ki, Azərbaycan özü belə bir konfransın təşəbbüskarı olmalıdır. Bu məsələdə ümumiyyətlə Ermənistanı görməzdən gələrdim. Orada hansı vəzifədə iştirak edəcək? Pul istəmək üçün? Ordunu yenidən bərpa etmək üçün? Ermənistan ərazisi heç bir zərər görmədi”.
Günay Rəsulqızı