İranın Nüvə Mərkəzindəki partlayışı kim törədib? – “ABŞ-la danışığa məcbur olacaqlar”
12:25 / 12.04.2021
687
"İran geri çəkilərək, nüvə məsələsində beynəlxalq
ictimaiyyətin şərtlərini qəbul etməyə məcbur olacaq”.
Bu sözləri Sfera.az-a açıqlamasında İranın Nətənz
Nüvə Mərkəzində baş verən partlayışda kimlərin əli olması və olayın beynəlxalq nüvə
danışıqlarına necə təsir edəcəyi ehtimalını dəyərləndirərkən "Orta Doğu”
Araşdırma Mərkəzinin rəhbəri Sədrəddin Soltan deyib:
"Bu partlayışı kimin törətdiyini demək çətindir.
Amma İsraildə nəşr edilən qəzetlər yazır ki, hadisə "Mosad”ın kiberhücumu nəticəsində
baş verib”.
Həmsöhbətimizin fikrincə, baş verən hadisə
İranın nüvə obyektlərinin təhlükə mənbəyi olduğunu açıq şəkildə sübut edir: "Bu
İran nüvə obyektində təhlükəsizlik sisteminin yarıtmaz vəziyyətdə olduğunun
göstəricisidir. Deməli, İranın nüvə
obyektinin təhlükəsizliyi yaxşı mühafizə olunmur. Tehran bunu etiraf etməlidir. Dərin
və qalın bunkerlər qazıb nüvə müəssisələrini orada gizlətməklə təhlükəsizliyə təminat
vermək olmaz. Müasir texnologiya ən dərin beton təbəqəsindən də keçir. Belə vəziyyətdə
hansısa terrorçu təşkilat da obyektə rahat hücum edib, onu partlada bilər”.
Politoloq qeyd edib ki, İranın nüvə mərkəzində
baş vermiş partlayış oradakı işləri ən azı 9 aya qədər ləngidəcək. S. Soltan düşünür ki, bu məsələ Tehranı atom
nüvə danışıqlarında beynəlxalq ictimaiyyətin şərtlərini qəbul etməyə zorlayacaq:"Düşünürəm ki, yaranmış vəziyyətdə İran iddialarından vaz keçərək ABŞ-la danışıqlara getməyə məcbur olacaq. İran
özünün nüvə obyektlərinə qapılarını açmalıdır”.