Sfera.az məlumatına görə, Brayan Huk jurnalistlərə bildirib ki, ABŞ hökuməti İranın İnqilab Keşikçiləri Korpusunun bu ölkənin cənub-qərbindəki şəhərlərdən birində etirazçılara avtomatlardan atəş açdığını əks etdirən videogörüntülər əldə edib.

Onun sözlərinə görə, təkcə həmin insidentdə yüzdən çox adamın öldürüldüyü haqda məlumat alıblar. Daha bir neçə yüz adam isə Tehranda və onun ətraflarında öldürülüb. 

Dövlət Departamenti İnqilab Keşikçilərinin nümayişçilərə avtomatlardan atəş açdığını əks etdirən videokadrları dərc etməyib, amma Brayan Huk bildirib ki, onun ölənlərin sayının 1000-dən çox olduğu barədə qiymətləndirmələri müstəqil qruplardan əldə edilmiş video və informasiyalara əsaslanır.

Diplomat qeyd edib ki, bütün ölkələrin İran xalqı ilə bir olmaq, diplomatik səylərlə İran rejimini təcrid etmək və həmin qətllərə görə məsuliyyət daşıyanların cəzalandırılmasına nail olmaq vaxtı gəlib çatıb.

Bu arada İranda benzinin bahalaşmasına qarşı keçirilən etiraz aksiyalarda öldürülən fəalların dəfni ilə bağlı sosial şəbəkələrdə videogörüntülər yayılıb. Videolardan görünür ki, xalq öldürülən fəalları şəhid kimi böyük coşqu ilə son mənzilə yola salır.(yeni sabah)