Sfera.az xəbər verir ki, Dövlət Statistika Komitəsinin məlumatına görə 2022-ci ilin ötən ayları ərzində bir istehlakçı orta hesabla hər ay 426,8 manat xərcləyib.

Bir il əvvəl əhalinin adambaşına düşən istehlak xərci 365,5 manat idi. Bu il istehlak xərclərinin adambaşına 61,3 manat, yəni 16,8 faiz artmasının şahidi oluruq.

Xərclərin bu dərəcədə artması 2 səbəblə əlaqəlidir. Birinci əsas səbəb ölkəmizdə cari dövrdə yüksək inflyasiyanın qeydə alınmasıdır. Rəsmi hesablamalara görə qiymətlər ötən illə müqayisədə 12,4 faiz artıb. Qiymətlərin artması o deməkdik ki, istehlakçı eyni miqdarda məhsulun alınmasına bu il daha çox pul ödəyib.

İstehlak xərclərinə təsir edən digər amil əhalinin real gəlirləridir. Cari ildə əhalinin real gəlirlərində 7,1 faiz artım baş verib.

Həm yüksək qiymət artımı, həm də real gəlirlərin olması hesabına əhalinin istehlak xərcləri 17 faizə yaxın artıb. İnflyasiya nəzərə alınmadığında xərclərdəki real artım 4,6 faiz olub.

Əhalinin xərcləri 2 böyük hissədən - pərakəndə ticarət və pullu xidmətlərdən ibarətdir.

Əhali bu il adambaşına hər ay 346,7 manat pərakəndə ticarətdə pul xərcləyib. Bu, bir il əvvəllə müqayisədə 46,3 manat çoxdur.

İnsanlar ərzaq mallarının, həmçinin spirtli içki və siqaretin alınmasına adambaşına 197,8 manat, qeyri-ərzaq mallarının alınmasına adambaşına 148,9 manat xərcləyib. Ötən illə nisbətən bu il ərzaq xərcləri 32,8 manat, qeyri-ərzaq xərcləri 13,5 manat artıb.

Pullu xidmətlər üzrə adambaşına düşən aylıq xərc 80,1 manat olub. Bunun 10,1 manatı iaşə xərclərindən, 70 manatı digər pullu xidmət xərclərindən ibarətdir.

Ümumilikdə, əhalinin istehlak xərclərinin 46,34 faizi ərzaq, 34,9 faizi qeyri-ərzaq, 18,76 faizi pullu xidmətlər hesabına yaranıb. Başqa sözlə bu il əhali xərclədiyi hər 100 manatının 46 manatdan çoxunu ərzağın alınmasına, 35 manatını qeyri-ərzaq mallarının alınmasına, 19 manata yaxınını isə pullu xidmətlərdən istifadəyə ayırıb.

Əlavə edək ki, inkişaf etmiş və orta inkişaf səviyyəsinə çatan ölkələrdə istehlak xərclərinin strukturunda bölgü əksinə olur. İnsanlar daha çox pulu xidmətlərə, daha sonra qeyri-ərzaq mallarına və ərzaq məhsullarına xərcləyir. İnkişaf etmiş ölkələrdə əhalinin ərzaq xərclərinin cəmi xərclərdə payı hətta 20 faizi keçmir.