Sfera.az xəbər verir ki, bu sözləri Yeni Azərbaycan Partiyası Nizami rayon Təşkilatının sədr müavini Ramin Əhmədov ölkənin bəzi şəhər və rayonlarında tətbiq olunan sərt karantin rejimi ilə bağlı danışarkən deyib.

YAP rəsmisi qeyd edib ki, dövlət virusun ölkəmizdə kütləvi yoluxmalara və ölümlərə səbəb olmasının qarşısını almaq üçün dəqiq strategiya yürüdüb və indi də eyni xətlə irəliləyir: "Mən dövlətin COVİD-19 infeksiyasına qarşı apardığı mübarizəni yaxından izləyirəm. Müşahidələrim göstərir ki, Azərbaycan dünyaya koronavirusla mübarizədə yeni model təqdim edir. Həm əhalinin sosial vəziyyəti, həm də insanların sağlamlığı dövlətin tam nəzarətindədir. Yəni dövlətimiz əhalinin COVİD-19 infeksiyasına yoluxması üçün bütün xilas metodlarını sınaqdan keçirir. Bəs, əhali dövlətin göstərdiyi qayğıya adekvat olaraq yoluxmanın artmaması üçün nəsə edirmi? Mən deyərdim, xeyir. Təbii ki, əhali karantin qaydalarına əməl etsəydi, sərt karantin rejimi yenidən tətbiq edilməzdi. Analoji qərarın yenidən verilməsi nə dövlətin, nə də əhalinin maraqlarına uyğundur. Çünki məhdudlaşdırmaların tətbiq olunması dövlətin və vətəndaşın iqtisadi gəlirlərini kəskin azaldır. Ona görə də vətəndaşlarımız bu dəfə sərt karantin rejiminin qaydalarına tam əməl etməklə həm dövləti, mən də özlərini bu koronavirus bəlasından qısa müddət ərzində xilas edə bilər. Yoxsa Azərbaycanda faciəvi ssenarilərin yaşanmasına şahidlik edəcəyik".

Koronavirusu "siyasi oyun" adlandıranlara səslənən Ramin Əhmədov qeyd edib ki, belə sosial şəbəkə "qəhrəmanları" vəziyyətin gözlənilməz məcraya yönəlməsində birbaşa günahkardırlar: "Vətəndaş belə riyakarlara qarşı birlik nümayiş etdirməlidir, "inanıram", "inanmıram" müzakirələrinə son qoyulmalıdır. Çünki mütəxəssislərin qənaətlərindən belə nəticəyə gəlmək olur ki, Azərbaycanda pandemiya ilə bağlı vəziyyət heç də ürəkaçan deyil. Belə bir məqamda hər məsuliyyətsiz davranış vəziyyətin daha da gərginləşməsinə təkan verir". Ramin Əhmədov qeyd edib ki, bundan sonra hər kəsin taleyi öz əlindədir: "İnsanlarımız nə istəyir? İstəyir ki, İspaniya, İtaliya və digər Avropa və Latın Amerikasındakı faciəvi vəziyyət bizdə də yaşansın? Hər bir fərd öz ailəsini, yaxınını qorumaq məsuliyyətini öz çiyinlərində hiss etməlidir. Təbii ki, valideynini, övladını düşünən şəxs öz məsuliyyətini dərk etməli, qaydlara qeyri-şərtsiz əməl etməlidir. Belə həssas məsələlərdə məsuliyyətsiz davranışlar yolverilməzdir. Sərt karantin rejimin qaydalarına əməl etməyənlər hüquqi məsuliyyətə cəlb olunmalıdırlar".