\"İnanmıram ki, Paşinyan belə bir əmr versin...\" - Şuşa və Naxçıvana atəş göstərişini kim verib?
15:15 / 14.07.2021
676
Xəbər verdiyimiz kimi, erməni silahlı qüvvələri Şuşa
və Naxçıvan üzərindən hərbi birləşmələrimizi atəşə tutub. Erməni təxribatı nəticəsində
bir hərbçimiz yaralanıb.
Məsələ ilə bağlı Sfera.az-a danışan İbrahim Cəfərov
Naxçıvan və Şuşaya atəş əmrinin Nikol Paşinyan tərəfindən verilmədiyini
bildirib: "Sülhməramlıların bu məsələ ilə bağlı məsuliyyəti
çox böyükdür. Çünki onların əsas missiyasi bölgədə sülhü və atəşkəsi təmin etməkdir.
Bütün hallarda atəşkəsin pozulması Rusiya sülhməramlılarının üzərinə böyük məsuliyyət
qoyur.
İkincisi, atəşkəsin pozulması, erməni tərəfindən atəşin
açılması və s. bütün bunlar Ermənistan ordusunda infrastrukturun sıradan çıxmasının
göstəricisidir. 44 gün ərzində davam edən müharibə Ermənistan Silahlı Qüvvələrinin
bütün infrastrukturunu sıradan çıxarıb.
Bu gün Ermənistanda vahid mərkəzdən idarə olunan
ordu olduğunu düşünmək mümkün deyil. Artıq Ermənistan ordusunda özbaşınalıq müşahidə
olunur. Ola bilsin ki, erməni əsgərləri atəşkəsi pozmaqla bağlı əmri vahid mərkəzdən
almayıblar. Lakin Paşinyanın imzaladığı sənədə əks getmək məntiqə sığmır. Bu,
daha çox Paşinyanın əleyhinə olan bir addımdır və ona qarşı olan qüvvələrin işinə
bənzəyir. İnanmıram ki, Paşinyan Şuşanın atəşə tutulması ilə bağlı hər hansı əmr
versin. Bu inandırıcı görünmür".
Əzizə Zeynal
Sfera.az