Bu sözləri Sfera.az-a açıqlamasında allerqoloq-pulmonoloq Ramin Nəriman deyib.

 

O bildirib ki, COVID-19 zamanı burun-boğazdan ediləcək yaxmaya hazırlıq qaydası belədir: səhər yuxudan oyanandan sonra ağzınızı yaxalamayın, dişinizi fırçalamayın, su-çay içməyin, yemək yeməyin, siqaret çəkməyin, burnunuzu silib təmizləməyin. Yaxma verəndən sonra gündəlik həyatınıza davam edə bilərsiniz.

Həkimin sözlərinə görə, diaqnostikanın digər metodu seroloji metoddur:

"COVID-19-u təyin etmək üçün erkən dövrdə qanda koronavirus əleyhinə igM və igG yoxlamağın demək olar ki, heç bir diaqnostik əhəmiyyəti yoxdur. Çünki bunlar ən tez xəstəlik başlayandan 5-7 gün sonra yarana bilər. Xəstəliyin müalicəsində isə məhz ilk həftə həyati vacib dövrdür. Yəni igM və igG əsasında diaqnozlaşdırılan COVID-19 artıq gecikmiş dövrü əhatə edir. Xəstəliyin ən ağır dövrü 6-12-ci günləri əhatə edir".

Həkim qeyd edib ki, döş qəfəsinin kompyuter tomoqrafiyası (KT, CT) da COVID-19 xəstəliyini aşkarlama metodlarından biridir. 

"KT-nin də olunması üçün şikayətlər başlayandan sonra ən azı 3 sutka gözləmək lazımdır. KT müayinənin ən optimal günləri 5-7-ci günlərdir. Əgər xəstədə yaxma metodu ilə COVID-19 aşkarlanıbsa və pasientin vəziyyəti qənaətbəxşdirsə, KT etməyə gərək yoxdur. Xəstəlik sağalandan sonra isə təkrar KT etmək qəti yolverilməzdir. COVID-19 zamanı ağciyərdə yaranan dəyişikliklər 2-3 ay ağciyərdə qala bilər və bu tədricən keçib gedəcək. Heç bir müayinə metodu koronavirusu 100% tam təsdiq və ya tam inkar etmir.

Əlavə olaraq onu deyim ki, soyuq xəstəliyi hədsiz dərəcədə ağırlaşdırır. Xəstəlik dövründə çimmək, duş, vanna qəbul etmək olmaz".