İftara qədər işləməyən restoranlarla bağlı açıqlama – Bu, qanun pozuntusudur?
11:22 / 15.04.2021
2152
Ramazan ayı girəndən ictimai-iaşə obyektləri
ilə bağlı bir sıra söz-söhbətlər yayılıb. Belə ki, bəzi vətəndaşlar bir sıra
restoranların iftara qədər fəaliyyət göstərmədiyini, bunun dünyəvi dövlətdə
yolverilməz olduğunu vurğulayırlar. Qeyd edilir ki, həmin obyektlər inanclı insanlara hörmət etdikləri
kimi, oruc tutmayan şəxsləri də nəzərə almalıdırlar.
Maraqlıdır ki, restoranların bu cür addımı nə
dərəcədə doğrudur? Və ya belə olduğu halda istehlakçıların hüquqları pozulurmu?
Bununla bağlı Milli Məclisin İnsan hüquqları
komitəsinin üzvü, deputat Naqif Həmzəyev Sfera.az-a açıqlamasında deyib ki,həmin
iaşə obyektləri dövlət deyil, özəl müəssisələrdirlər və onların sahibləri də
müstəqildirlər:
"Bu barədə özləri qərar verirlər. Əgər
sahibkarların biznes maraqları varsa, təbii ki, işlətməlidirlər. Əks halda,
iftara kimi obyektin fəaliyyətini məsləhət görmürlərsə, onlara heç kim qadağa
qoya və ya təzyiq göstərə bilməz. Digər insanların hüquqlarının qorunması
baxımından iaşə obyektlərinin işləməsi yaxşı olar. Amma rəqabət mühitində kimin
işləyib, kimin işləməməsinə özləri qərar verir, nəticə etibarilə dövlətə vergi
ödəyirlər. Onlara tövsiyə vermək səlahiyyətlərimiz yoxdur.
Restoranlardan biri işləmirsə, digəri işləyir.
Fikrimcə,burda heç bir problem yoxdur. Vətəndaşlarımız digər yerlərin xidmətindən
də istifadə edə bilərlər. Qanunvericilikdə elə bir qayda yoxdur ki, siz axşama
qədər işləməlisiniz”.
Azad İstehlakçılar Birliyinin sədri Eyyub
Hüseynov isə saytımıza açıqlamasında Nazirlər Kabinetinin 94 saylı qərarına
istinad edib: "Həmin qərarda göstərilib ki, restoranlar iş
saatları barəsində qapısında məlumat qoymalıdır. Lakin restoranların iş
saatları – hansı saatdan hansı saata kimi fəaliyyət göstərməsi ilə bağlı heç
bir tələb yoxdur. Ölkədə biznes qurumları üçün kifayət qədər sərbəst iş şəraiti
yaradılıb. Vaxtı qeyd etməklə restoranlar iş rejimini istədikləri kimi özləri
müəyyən edə bilərlər. Burada restoranların üzərində öhdəlik yoxdur ki, o gündüz
işləməlidir, ya yox. Bu barədə mənə dünən iki zəng gəlib. Amma qeyd etdiyim
kimi restoranlar sərbəstdirlər, sadəcə istehlakçılara yazılı məlumat vermək şərtilə”.
