Hulusi Akar şəhid Valeh Məmiyevdən danışarkən göz yaşlarını saxlaya bilmədi - VİDEO
13:14 / 09.11.2021
983
Azərbaycan və Türkiyənin müdafiə nazirlərinin Bakıda keçirilən mətbuat konfransında təsirli anlar yaşanıb.
Sfera.az xəbər verir ki, Türkiyə milli müdafiə naziri Hulusi Akar Vətən müharibəsinin şəhidi, baş leytenant Valeh Məmiyevlə bağlı xatirəsini danışarkən kövrəlib:
"Təlimdə qarşılaşıb duyğulu anlar yaşadığımız bir baş leytenant var - Valeh Məmiyev. Təlim vaxtı ona dedim ki, bu təlimlər önəmlidir və sizin uğurunuzdur. Amma əsl uğur işğal altındakı torpaqların azad edilməsidir demişdim. Həmin baş leytenantın yaralanması və xəstəxanada "verdiyim sözü tutdum” deməsi çox böyük bir xatirə idi bizim üçün”.
Qeyd edək ki, Valeh Məmiyev 1994-cü il martın 27-də Yardımlı rayonunun Kürəkçi kəndində anadan olub. 2015-ci ildə tank tağım komandiri kimi vətənə xidmətə başlayıb. Bütün təlimlərə aparıcı zabit kimi qoşulub. 2020-ci il türk-azərbaycan təlimlərində böyük qəhrəmanlıqla iştirak edib və təlimlərin sonunda Hulusi Akar tərəfindən fərqlənmə ilə təltif edilib. Vətən müharibəsi zamanı Cəbrayılın, Füzulinin, Zəngilanın və Qubadlının azadlığı uğrunda gedən döyüşlərdə tank komandiri kimi iştirak edib. Oktyabrın 19-da Qubadlı döyüşləri zamanı ağır yaralanıb və 4 gün sonra aldığı yaradan şəhid olub. Son anında təbəssümlə deyib ki, "mən qardaş Türkiyənin müdafiə nazirinə verdiyim sözə əməl elədim. Vətən sağ olsun”.
V.Məmiyev "Vətən uğrunda”, "Cəbrayılın azad olunmasına görə” və "Qubadlının azad olunmasına görə” medalları ilə təltif edilib.
