"Hansısa şizofrenin Azərbaycan barədə proqnoz verməsinin heç bir əhəmiyyəti yoxdur” - Deputatlardan Jirinovskiyə sərt SÖZLƏR

Rusiya Liberal-Demokrat Partiyasının sədri, Rusiya Dövlət Dumasının deputatı Vladimir Jirinovskinin Azərbaycanla bağlı son çıxışı cəmiyyət tərəfindən birmənalı qarşılanmayıb.

Sfera.az-ın məlumatına görə, bu barədə Milli Məclisin deputatları da öz fikirlərini bölüşüb. Belə ki, deputat Aydın Mirzəzadə Jirinovskinin son çıxışının təsadüfi olmadığını düşünür. Onun fikrincə, bu çıxış Rusiyadakı erməni diaspor dairələri tərəfindən sifariş edilib:

"Prezident İlham Əliyevin Rusiyaya bu yaxınlardakı uğurlu səfəri onlarda ciddi narahatlıq yaradıb. İndi siyasi təxribatlarla Azərbaycan-Rusiya münasibətlərini soyutmaq, ölkəmizin Vətən Müharibəsində qazandığı qələbəyə və yüksək siyasi nüfuza kölgə salmağa çalışırlar. Ancaq unudurlar ki, nüfuz və yaxşı münasibətlər kiminsə çıxışı ilə deyil, ciddi və səmimi siyasət və fəaliyyətlə qurulur”.

Millət vəkili Bəhruz Məhərrəmov bəzən rəsmi Moskvanın deyə bilmədiyini Jirinovski vasitəsilə çatdırdığı iddiasından söz açıb:

"Daxili siyasətdə konkret olaraq ayrı-ayrı məmur oliqarxların zaman-zaman silkələnməsi üçün bu avantüristin xidmətindən istifadə oluna bilər. Amma dəqiqdir ki, Rusiya kimi nəhəng gücün Jirinovskinin pozuq və pətək dili ilə danışmasına ehtiyacı yoxdur. Konkret Azərbaycana gəlincə, Rusiya Azərbaycan münasibətlərinin xarakteri də, səviyyəsi də, tərəflərin məqsəd və niyyəti, maraqlarının sərhədləri də bəllidir. Rusiyanın Azərbaycan siyasətini şəxsən Putin müəyyən edir. Prezident Putinin isə ən ağır dövrlərdə, Vətən müharibəsinin gedişatında Azərbaycana münasibəti aydın göründü. Yəni indi hansısa şizofreniya xəstəsinin Azərbaycan barədə plan və proqnoz verməsi, hansısa bir təlxəyin təkliflər irəli sürməsinin heç bir əhəmiyyəti yoxdur”.

Deputat Ceyhun Məmmədov isə bildirib ki, Vladimir Jirinovski rəsmi şəxsdir və bu baxımdan onun bəyanatlarına mütləq reaksiya verilməli idi:

"Azərbaycanın belə sərt mövqeyi Jirinovski və onun kimi zaman-zaman sərsəm bəyanat verənlərə dərs olmalıdır. Onlar Azərbaycan eləcə də, digər keçmiş sovet respublikaları haqqında fikir söyləyərkən ikitərəfli münasibətləri nəzərə alıb yuxarıdan aşağı baxmamalı, istifadə etdikləri ifadələrdə çox diqqətli və məsuliyyətli olmalıdırlar. Bilməlidirlər ki, onların bu kimi fikirləri ciddi etiraza səbəb olacaq, cəmiyyət tərəfindən hiddətlə qarşılanacaq və ikitərəfli münasibətlərə xələl gətirəcək. 

Bu kimi bəyanatlara kəskin reaksiya verilmədiyi halda,  Jirinovski və onun kimilərin dilindən daha sərsəm bəyanatlar eşidə bilərik. Azərbaycan Rusiyaya nota verməklə qətiyyətli və prinsipial mövqeyini nümayiş etdirdi,  Jirinovski kimilərə yerini və həddini bildirdi”.

Günay Rəsulqızı
Sfera.az
Sehliyali
Turan Bank

OXŞAR XƏBƏRLƏR