Daşı bütə çevirib ətrafına dolanmağın özü təkallahlığı əsas prinsip hesab edən İslama da uyğun deyil. Amma təəssüf ki, ifrata varanların sayı az deyil. Karantin günlərində dini ziyarətgahlarda bu kimi ayinlər qadağan edilibmi, ümumiyyətlə pir və məscidlərə axın dayandırılıbmı?

"Virusun İrandan, ziyarətgahlardan yayılmasını düşünmək yanlış olardı. Çində pir var idimi bəyəm? Məşhəd, Qum ziyarətgahları isə hazırda bağlıdır. Azərbaycanda da məscid və ziyarətgahlara giriş məhdudlaşdırılıb. Kütləvi olaraq dini ayinlər edilmir. Ona görə, əsas görmürəm, kimsə desin ki, dini ayinlər zamanı zəvvarlar daşı, divarı yalamaqla xəstəliyi yayırlar. Bir çoxları sifarişli şəkildə daşı divarı öpərək, İslamı gözdən salırlar. Bu məqsədli addımdır. Məqsədli şəkildə daşı divarı yalamaq ziyarətgahı gözdən salır, hörmətsizlik edir. Bu kimi ayinlərdə ifrata varmaq kökündən yalnışdır. Ümumiyyətlə İslamda belə bir hökm, dini ayin yoxdur. Virus oldu olmadı, bu kimi əməllər, yəni kiminsə əlini, dilini daşa sürtməsi xürafatdır, ziyarətgaha qarşı hörmətsizlikdir”.

Koronavirus olmadan da dünyamızda QİÇS, Hepatit, adını unutduğumuz, amma elə bu vasitələrlə yayılan yüzlərlə xəstəlik var. Dini ziyarətgahlarda müxtəlif ölkələrdən gələn yüzlərlə, minlərlə insanın vətəninə döndükdən sonra yoxlanılması yaxşı olardı. Koronavirus yoxa çıxdıqdan sonra da biz bunu unutmamalıyıq. Bizdəki dini ziyarətgahlarda da adamlar sıraya düzülüb daşı-divarı öpürlər. Bunu birdəfəlik qadağan eləmək lazımdır. Bəs Ruhani İdarəsi, Dini Komitə nə işə yarayır?! Hər şeyin ən doğrusunu,ən düzgününü etməsək, İslamda da xürafatdan başqa bir şey qalmayacaq.