Sahibkarlara ayrılan kreditlər dövlət büdcəsinin və geri qaytarılan vəsait hesabına maliyyələşdirilir. Əvvəlki illərlə müqayisədə son dövrlər verilən güzəştli kreditlərin həcmində ciddi artıma nail olunmayıb. Təxminən hər il 140-180 milyon manat həcmində kredit verilir. Ötən il isə pandemiya ilə əlaqədar güzəştli kreditlərin həcmi bir qədər azalıb.

 

2020-ci ildə sahibkarlara 126,9 milyon manat güzəştli kredit ayrılıb. Bu, 2019-cu illə müqayisədə 48,1 milyon manat və ya 27,5 faiz azdır. Ötən il verilən kreditlərin 15,4 milyon manatı mikro, 19,7 milyon manatı kiçik, 71,7 milyon manatı orta, 20,1 milyon manatı böyük sahibkarlara verilib.

 

İqtisadçı Nazim Bəydəmirli hesab edir ki, sahibkarlara daha çox güzəştli kreditlərin verilməsi üçün Mərtkəzi Bankın və Dövlət Neft Fondunun vəsaitlərindən də istifadə edilməlidir. Onun fikrincə, bunlarla bərabər ölkədə biznes kreditləri üzrə faiz dərəcələri aşağı salınmalıdır. O bu məqsədilə effektiv monetar tədbirlər görülməsinin zəruri olduğunu söyləyib:

 

 

Kommersiya banklarının ayırdığı kreditlər bahalı olduğundan dövlətin güzəştli kreditlərə tələb yüksəlir. Kredit üçün ayrılan vəsait az, kredit götürmək istəyənlər isə çox olduqda korrupsiya hallarına əsas yaranır. Sahibkarlar çalışır ki, müxtəlif yollarla həmin aşağı faizli kreditləri alsın”.

 

N.Bəydəmirli qeyd etdi ki, ölkəmizdə kredit faizləri aşağı salınmadan və aşağı faizlə kredit qoyuluşunun həcmi artırılmadan daha çox sahibkar güzəştli kreditlərdən faydalana bilməyəcək: "Dövlət büdcəsinin vəsaiti hesabına müxtəlif dəstək layihələrinin həyata keçirilməsi yaxşıdır. Ancaq nəticə almaq üçün uzun müddət tələb olunur. Heç bir ölkə yalnız dövlət büdcəsinin vəsaiti hesabına sahibkarlığın maliyyələşdirilməsinə, onların inkişafına nail olmayıb. Kredit faizləri aşağı olan ölkələrin təcrübəsi göstərir ki, hökumətlər ümumi kredit faizlərinin aşağı düşməsinə təşəbbüs göstəriblər. Buna da Mərkəzi Bankın pul-kredit siyasəti, uçot dərəcəsinin aşağı salınması və kommersiya banklarına ucuz resursların verilməsi ilə nail olublar”.

 

Həmsöhbətimiz ölkəmizdə kredit faizlərinin yüksək olmasında və güzəştli kreditlərdən daha çox sahibkarın istifadə edə bilməməsində məmur sahibkarlığının da rolunun böyük olduğunu dedi: "Sahibkarlığın İnkişafı Fondu əvvəllər Sahibkarlığa Kömək Milli Fondu adlanırdı.  Həmin dövrdə verilən kreditlər əsasən böyük şirkətlərin və holdinqlərin maraqlarına xidmət edirdi. Mikayıl Cabbarov İqtisadiyyat naziri təyin ediləndən sonra güzəştli kreditlərdən daha çox sahibkarın istifadə edilməsi istiqamətində tərpəniş var.