"9-cu sinifi bitirib kosmetoloq işləyir" - Parlamentdə MÜZAKİRƏ

"Bir mərkəz yaradılsın və plastik cərrahlar məhz orada fəaliyyət göstərsinlər."

Sfera.az xəbər verir ki, bunu Milli Məclisin bu gün keçirilən plenar iclasında deputat Səyyad Salahlı deyib.

Deputatın sözlərinə görə, hər bir səhv insan işidir, həkim də səhv edə bilər. Lakin belə hallarda digər həkimlərin dərhal müdaxilə edə bilməsi üçün uyğun şərait yaradılmalıdır.

"Hazırda hər kəs fərqli yerlərdə əməliyyatlar aparır. Vətəndaş isə haraya müraciət edəcəyini bilmir. Bu sahədə sistemli yanaşmaya ehtiyac var",-millət vəkili bildirib.

Deputat, həmçinin müraciətlərdən birini diqqətə çatdırıb:

"Qəhrəmanova Sara və Vəliyev Fərhad adlı vətəndaşlar müraciət edib və bildirib ki, Ülviyyə İlyasova adlı şəxs övladlarını əməliyyat edib. Əməliyyatdan sonra komaya düşən şəxsi evinə apararaq evdə kömək etmək istəyib. Nəticədə 2 uşaq anası olan şəxs həyatını itirib".

S.Salahlı bildirib ki, şikayətçilərin sözlərin görə, Ülviyyə İlyasovanın heç bir tibb təhsili yoxdur və 9-cu sinifi bitirib:

"İndi isə o, Qurbanova soyadı ilə kosmetoloq kimi gizli fəaliyyət göstərir".

Firuzə Əliyeva
Sfera.az