Sfera.az bildirir ki, fevralın 1-nə olan məlumata əsasən, mühərrik yağlarının dəyişdirilməsi xidmətinin dəyəri orta hesabla 4 manatdan çox bahalaşaraq 39,4 manata yüksəlib. 2020-ci ilin dekabrında yağdəyişmə xidmətinin qiyməti 35 manat idi.

 

 

Mühərrik yağının dəyişdirilməsi xidmətinin qiyməti 2019-cu ildən 2020-ci ilin sonuna kimi 34-35 manat səviyyəsində qalıb. Amma 2021-ci ilin yanvarından qiymətlər 11 faizdən çox artıb. Ötən il bir litri 10 manata satılan mühərrik yağlarının qiyməti hazırda 11-11,5 manatdır.

 

 

Avtomobil nəqliyyatı üzrə ekspert Elməddin Muradlı mühərrik yağlarının bahalaşmasını 2 səbəblə əlaqələndirir. O birinci səbəb kimi bəzi istehsalçı ölkələrdə mühərrik yağlarının bahalaşmasını göstərir: "Azərbaycanda istehlak edilən sürtkü yağlarının əksəriyyəti xaricdən gətirilir. İstehsalçı ölkələrin bəzilərində, o cümlədən Rusiyada qiymətlərdə artım var. Bəzi ölkələrdə olan istehsalçılarda isə qiymətlər dəyişməyib”.

E.Muradlı ölkəmizdə mühərrik yağlarının bahalaşmasının digər səbəbinin gömrük xərclərinin artması ilə bağlı olduğunu söyləyib: "Gömrükdə xərclər süni şəkildə artırılıb. İdxal mallarının gömrük dəyəri müəyyənləşdirilən zaman daha yüksək qiymət götürülür. Gömrük dəyərinin artırılması idxal malına tətbiq edilən əlavə dəyər vergisinin də məbləğinin artımına səbəb olur. Faktiki olaraq gömrükdə süni qiymət artımı edilib”.