General Muradov erməni milyarderlərlə niyə görüşür? – “Həm özü qazanmaq istəyir, həm də...”
15:34 / 14.04.2021
1349
"Erməni milyarderlərlə Rusiya sülhməramlılarının
komandanı, general Muradovun görüşü siyasi xarakter daşımır. Çünki bu məsələdə
siyasi qərar verən nə Muradovdur, nə də erməni milyarderləri. Burada yalnız həmin
milyarderlərin maliyyəsinin infrastruktur layihələrinin bərpa işlərinə sərf
edilməsindən söhbət gedə bilər”.
Bu sözləri Sfera.az-a açıqlamasında general
Rüstəm Muradovun erməni milyarderləri olan bank sahibi Artak Balayan və Armon
Balayanla görüşünün məqsədlərini şərh edərkən politoloq Natiq Miri deyib:
"Rusiyanın Qarabağda ciddi geosiyasi maraqları
var. Qarabağdan Ermənistana köç etmiş ermənilər Rusiya sülhməramlıları vasitəsilə
Qarabağa qaytarılır. Onlar da əsasən Xankəndinə qayıdır ki, bu da müəyyən
problemlər yaradır. Çünki Qarabağın digər hissəsində yaşamış ermənilər artıq həmin
ərazilərə qaytarıla bilmədikləri üçün onlarla bağlı yeni evlərin tikintisi
planlaşdırılır. Lakin Qarabağın separatçı rejimində həmin məsələni həll etmək
üçün pul yoxdur. Separatçılar bütün bunları Rusiyanın hesabına həll etməyə
çalışır”.
Həmsöhbətimiz bildirdi ki, Rusiya burada yeni
yaşayış məskənləri yaratmaqla dolayısı ilə özünün Qarabağda uzunmüddətli
qalmasını təmin etməyi düşünür. Belədə də erməni ictimai rəyində Rusiyanın
xilaskar obrazını yaratmaq istəyirlər:
"Bu cür yaşayış məskənlərin tikintisi,
infrastrukturun yenidən bərpası isə böyük maliyyə tələb edir. Rusiya isə həmin maliyyəni öz büdcəsindən vermək gücündə deyil və bunu etmək istəmir. Erməni
milyonerləri, iş adamları ilə sülhməramlıların rəhbəri Muradovun təşkil etdiyi
bu sayaq görüşlər də əsasən məhz sözügedən layihələrin maliyyələşdirilməsi məqsədi
daşıyır.
Sülhməramlılara rəhbərlik edən generalitet də müəyyən mənada
maliyyə qazanmağı düşünə bilər. Belə "təcrübə”ni
70-80-ci illərdə Əfqanıstandakı Rusiya ordusunun timsalında görmüşük. Həmin illərdə
orda narkotik satışından başlamış, bütün qeyri-qanuni ticarətlə rus zabitləri məşğul
idilər. Eyni proseslər bu gün Qarabağın ermənilər yaşayan ərazisində də baş
verir”.
Elçin
