”The New York Globe” nəşri "AZERBAIJAN URGES FAIR PLAY BY FACEBOOK” (Azərbaycan Facebookda ədalətli olmağa çağırır) adlı məqalədə deyilir ki, 60 milyon azərbaycanlını təmsil edən Azərbaycan diasporu virtual dünyada gedən və sosial şəbəkələrdə öz əksini tapan savaşa qoşulub. Real savaş isə Ermənistanla Azərbaycan arasında gedir.

Böyük Britaniyanın "The Daily Telegraph” elektron nəşri İnstaqramda yayımlanan xəbərlərə istinadən bildirib ki, ABŞ-da həm də sosial media ulduzu kimi məşhur olan Kim Kardaşyan öz tərəfdarları üzərində olan təsirindən sui-istifadə edərək Ermənistanın Azərbaycana qarşı apardığı müharibəyə haqq qazandırır. Azərbaycan diasporu Kim Kardaşyanı Ermənistanın müharibə səylərini dəstəkləməkdə günahlandırır. Silah almaq üçün Ermənistana vəsait ötürməkdə ittiham edir. (Söhbət 1 milyon dollarlıq ianədən gedir. E.H.) Kim Kardaşyanın sosial mediada millətçi ehtirasları alovlandırması vəziyyəti daha da gərginləşdirib. Bu isə bölgədə sülhün bərqərar olması üçün göstərilən beynəlxalq səylərin ruhuna ziddir.

”The New York Globe” vurğulayır ki, Ermənistanla Azərbaycan arasında gedən şiddətli döyüşlər nəticəsində hər iki tərəf yüzlərlə itki verib, ölənlər arasında mülki şəxslər də az deyil.

Nəşr qeyd edir ki, 4 milyondan çox azərbaycanlı Facebook istifadəçisi tərəfindən imzalanmış bir müraciət Mark Zuckerbergə ünvanlanıb. Müraciətdə deyilir ki, Facebook baş verən olaylara ədalətli yanaşmalıdır. Facebook bəyan olunmuş bəlli standartlarına hörmət etməlidir. Bu sosial şəbəkə etnik erməni əməkdaşlarına öz mövqelərindən sui-istifadə etməyə imkan verməməlidir. Şosial şəbəkənin erməni əməkdaşları Facebookun azərbaycanlı istifadəçilərinin sülh çağırışlarına söykənən statuslarının yayılmasına imkan vermirlər. Bu isə Facebookun dəyərlərinə ziddir. Petisiya formalı müraciətdə belə deyilir

Göründüyü kimi, virtual aləmdə də ermənilərlə azərbaycanlılar arasında savaş qızışıb . O da etiraf olunmalıdır ki, 4 milyon azərbaycanlının eyni sənədə İnternet üzərindən imza atması da ciddi faktdır. Bu, ondan xəbər verir ki, Azərbaycan xalqı birlik və bütövlük içində işğal olunmuş torpaqlarımızın azadlığı uğrunda döyüşə atılıb. Bu müharibə hər yerdə, o cümlədən sosial şəbəkələrdə də davam edir.

Elbəyi Həsənli, Sürix