İnsan hüquqları müdafiəçisi Emin Milli (Emin Abdullayev) Azərbaycan əsgərlərini işğaldan azad etdikləri ərazilərdə qalan mülki ermənilərə qarşı humanist davranmağa səsləyib.

Sfera.az xəbər verir ki, bloqqer "Facebook" hesabından etdiyi paylaşımda həmin anların videoya çəkilib yayılmasını məsləhət görüb:

"Azərbaycan əsgərləri hər kəndi, qəsəbəni və hər şəhəri işğaldan azad edərkən orda qalan erməni mülki əhalisinə su, yemək, paltar verməlidirlər. Onlara sevgi və qayğı göstərməlidilər. Bunu kameralara çəkib mütləq yaymaq lazımdır. Bu həm bizim insanlıq borcumuzdur, həm dövlət siyasətidir, həm də əsl həqiqi və səmimi humanizmin zirvəsidir.

Mülki əhalini öldürmək hərbi cinayətdir və Azərbaycan əsgəri və zabiti bunu bilir. Bunu yalnız Sargisyan, Koçaryan kimi hərbi cinayyətkarlar edə bilərlər. Bunu tələb edənlər, istəyənlər də qələt edir. Bunu istəyənlər ya axmaqdılar, yada ki, provokatordular. Onların yerindəcə hər kəs cavablarını verməlidir. 

Anlamaq lazımdır ki, iki müstəvidə döyüşlər gedir. Hərbi cəhətdən biz qalib gəlirik. Amma qlobal informasiya məkanında erməni propaqandası hər yeri minalayıb, kameralar, dünya mediası hazırlıq vəziyyətinə gətirilib. Hər kəsə deyiblər ki, "barbar müsəlmanlar" "günahsız xristianları", erməni mülki əhalisinin ikinci soyqırımını hazırlayırlar. Erməni mülki əhalisinə əl vurmaq həm də bu minalara doğru ölümün üstünə qaçmaq deməkdir. 

Biz gərək bu minaları da zərərləşsizdirək və dünyaya insanlıq nümunəsi göstərək. Erməni nifrətinə Azərbaycan sevgisi ilə qalib gəlməliyik. Unutmayın ki, informasiya müharibəsi də gedir və burda da qələbəmiz hərbi qələbə qədər vacibdir!

Baş komandan dünən bir daha dediyi kimi, biz qisası döyüş meydanında alırıq, torpağlarımızı işğaldan azad edirik və qalib gəlirik. Biz istənilən mülki əhalini yalnız qorumalıyıq!"