Sfera.az-ın məlumatına görə, millət vəkili yeni qaydaların tətbiqində məqsədin vaksinasiya prosesini sürətləndirmək olduğunu deyib.

V.Bayramov həmçinin bununla bağlı  Ümumdünya Səhiyyə Təşkilatının statistikasından söz açıb:

"ÜST əhali arasında vaksinasiya səviyyəsinin ən azı 65 faizdən çox olduğu halda, əvvəlki normal həyata qayıtmağın mümkünlüyü qənaətindədir.  Nazirlər Kabineti yanında Operativ Qərargahın məlumatına görə, indiyədək 4 milyon 564 min peyvənd aparılıb. Hər iki doza peyvənd olunanların sayı isə 1 milyon 910 min nəfərdir. Azərbaycanda əhalinin cəmi 19.1 faizi hər iki doza peyvənd olunub. Göründüyü kimi, tam vaksinasiya səviyyəsinə görə Azərbaycan MDB-də birinci olsa da, peyvənd olunan vətəndaşlarımızın sayı hələlik ÜST-ün 65 faizlik tövsiyyəsindən aşağıdır.

Bu baxımdan yeni qaydaların tətbiqi ilə yanaşı, onların icrasına nəzarətin daha gücləndirilməsi və prosesin tam elektronlaşdırılmasına ehtiyac var. Daha məqsədə uyğun olardı ki, iri ictimai-iaşə müəssisələrində, mehmanxanalarda və iri ticarət mərkəzlərində elektron COVİD-19 passportlarını oxuyan xüsusi avadanlıqlar quraşdırılsın. Bu prosesə elektron nəzarəti formalaşdırmaqla yanaşı, eyni zamanda növbələrin sayını və kənar müdaxilələri azaldar”.

Deputatın sözlərinə görə, qaydaların icrasına ictimai nəzarətin gücləndirilməsinə ehtiyac var:

"Pandemiyanın ilk aylarında vətəndaş cəmiyyəti institutları maarifləndirmə tədbirlərində fəal iştirak etsələr də, sonrakı mərhələlərdə bu istiqamətdə aktivlikləri azaldı. Əksər dövlət qurumlarının yanında İctimai Şuraların yaradıldığını nəzərə alsaq, vətəndaş cəmiyyəti institutlarının prosesə aktiv cəlb olunması və monitorinqlər aparması məqsədə uyğun olardı.  Bütün bunlar vaksinasiya prosesinin sürətləndirilməsinə dəstək ola bilər”.

Xatırladaq ki, sentyabrın 1-dən yaşı 18-dən yuxarı olan şəxslər qapalı məkanda fəaliyyət göstərən ictimai iaşə müəssisələri, mehmanxanalar və iri ticarət mərkəzlərindən yalnız COVID-19 pasportu olduğu halda istifadə edə biləcəklər.