OPEC-in yeni hesabatında toxunulan məqamları şərh edən energetika sahəsi üzrə ekspert Zəfər Vəliyev hesab edir ki, icmal sənəddə Azərbaycan üçün iki məqam olduqca vacibdir. Ekspert söylədi ki, icmalda 2045-ci ilə qədər neftin ən böyük enerji istehlak payını qoruyub saxlayacağı və həmin tarixə kimi təbii qaza olan qlobal təlabatda artım dinamikasının davam edəcəyi qənaəti Azərbaycan üçün önəmlidir. 

"OPEC katibliyinin və mütəxəsislərinin hazırladığı proqnozdan çox, dərin bazar analizi nəticəsində yaranan rəydir. Bu rəyə ciddi yanaşmaq lazımdır. OPEC dolayısı ilə bildirir ki, 2045-ci ilə qədər neft və qaz bazarında hasilatçı ölkələr üçün əlverişli vəziyyət olacaq. 

2015, 2016 və 2017-ci illərdə neft-qaz sektorunda kəşfiyyat və hasilat işlərinin aparılması üçün 2014-cü illə müqayisədə olduqca az investisiya qoyulub.  İnvestisiyanın az qoyulması növbəti illərdə bazarda qıtlıq yaradacaq. 

Neft sektoruna yeni investisiyalar yönəldilməsə, yeni yataqlar aşkarlanmasa, hasilat olmasa, qarşıdakı illərdə təchizatçı ölkələr zəiflik göstərəcək, tələb olunan nefti bazara təqdim edilə bilməyəcəklər. Bu da qiymətlərin əlverişli səviyyədə qalmasına şərait yaradacaq. Buna görə də Azərbaycan 2045-ci ilə qədər özünün karbohidrogen ehtiyatlarından maksimum səviyyədə istifadə etməlidir”.

"2045-ci ilə qədər biz çalışmalıyıq ki, digər yataqlarda olan ehtiyatlardan maksimum səviyyədə istifadə edilsin. OPEC-in rəyi göstərir ki, 2045-ci ilə qədər neft-qaz bazarındakı vəziyyət Azərbaycanın xeyrinə olacaq. 

Eynilə, hasilatda olan qaz yataqlarımız var və qarşıdakı illərdə də digər yataqların imkanlarından istifadə ediləcək. 2021-2045-ci illərdə özümüzün qaz ehtiyatlarından da maksimum istifadə etməliyik. 

OPEC-in hesabatına görə 2045-ci ildə dünyada 2,6 milyard ədəd avtomobil olacaq. Onun 500 milyon ədədi elektromobil olacaq. Avtomobillərin hələ də çox hissəsi benzin və dizellə çalışacaq. Belə olan halda benzinə və yüksək keyfiyyətli təyyarə yanacağına tələbat artacaq”.