Əhalinin ərzaq xərclərinin 15 faizi bu məhsulların alışına yönəlir – Hansılardır?
11:32 / 15.07.2021
1003
Azərbaycanda son 5 ildə mal qrupları üzrə ərzaq xərclərinin
strukturunda müəyyən dəyişikliklər müşahidə edilir. Diqqəti çəkən əsas məqam
ondan ibarətdir ki, əhali tərəvəz, ət və duzun istehlakını daha sürətlə
artırır.
Sfera.az bildirir ki, 5 il ərzində ərzağa çəkilən xərc
15,08 milyard manatdan 21,7 milyard manata qədər artıb. Ötən müddətdə ərzağın
alınmasına sərf edilən vəsaitdə artım 43,8 faiz olub. Yuxarıda adıçəkilən məhsul
qrupları üzrə xərclərdə artım sürəti isə ümumi ərzaq xərclərindəki artım sürətini
qabaqlayır.
Tərəvəzin alınmasına çəkilən xərc 5 il ərzində
1,413 milyard manatdan 3,2 milyard manata kimi artıb. Qısa müddətdə tərəvəz
alışı 2,27 dəfə artıb.
Xüsusən, 2020-ci ildə tərəvəzə çəkilən xərcin 29,5
faiz artması müşahidə edilib. Bu artımdan sonra ərzaq xərclərində tərəvəz xərclərinin
payı 14,74 faizə çatıb. 2016-cı ildə tərəvəzə çəkilən xərc cəmi ərzaq xərclərinin
9,3 faizini formalaşdırırdı.
Tərəvəzə çəkilən xərcin artmasında bu növ məhsulların
bahalaşması da mühüm rol oynayıb. Son 5 ildə tərəvəz məhsulları 60 faiz səviyyəsində
bahalaşıb. Bahalaşma çəkilən xərcin artmasına səbəb olur. Amma 5 ildə 2,27 dəfə
artımda bahalaşma ilə bərabər miqdar ifadəsində artımın da payı böyükdür.
Ət alışına çəkilən xərc də çox artıb. Son 5 ildə ətə
çəkilən xərcdə artım 50 faizi ötüb. 2020-ci ildə əhali ət və ət məhsullarına
2,25 milyard manat xərcləyib ki, bu da cəmi ərzaq xərclərinin 10,36 faizidir.
2016-cı ildə ərzaq xərclərinin 9,95 faizi ət alışına çəkilən xərcdən ibarət
idi.
Ət və ət məhsullarına çəkilən xərcin artmasında əsas
rolu qiymət artımları oynayıb. 2016-cı ildən bəri ətin qiymətində 40 faiz artım
qeydə alınıb.
Duzun alışına çəkilən xərc isə 5 ildə 2,7 dəfə
artıb. 2016-cı ildə duz istehlakına 16,5 milyon manat xərcləyən əhali ötən il bu
məhsula 44,5 milyon xərcləyib. Yalnız 2020-ci ildə duz istehlakı 43 faiz artıb.
Vasif
